Lian Orluli, Hatubuilico– Tersa-feira, 10 Fevereiru 2026 –Aldeia Queo-Rudo, hamutuk ho Administrador Postu Hatu Builico, Xefe suku Molo, no Diretóra Servisu MAPPF inklui Komunidade, ofisialmente lansa programa kuda ai-oan Apronos no Masan iha Aldeia Queo-Rudo.
Atividade ida ne’e reprezenta pasu konkretu hodi suporta dezenvolvimentu ekonomia komunidade nian liu husi setor agrikultura no reflorestasaun. Programa ne’e nia alvu maka kuda ai-oan Apronos no Masan hamutuk 100,864, ne’ebé sei kuda tuir faze iha área oioin iha aldeia sira.
Xefe Aldeia Mulo ne’ebé reprezenta komunidade Queo-Rudo haktuir katak kuda ai-pronos no ai-masan iha valór ekonómiku ne’ebé aas ba komunidade nia futuru. Nia subliña, área Hatubuilico, partikularmente Aldeia Queo-Rudo, apropriadu tebes atu kuda apronos.
“Rai ne’e rai ne’e merese ba apronos duni. Tanba ne’e, ami apresia tebes programa ne’e no hein katak ba oin ami bele kuda tan ne’e prepara ba komunidade nia moris diak iha futuru,” nia dehan.
Entretantu, Diretór Agrikultura no Asuntu Komunitáriu ne’e subliña katak ai-apronos no ai-masan reprezenta potensiál lokál ida ne’ebé tenke dezenvolve liu tán. Nia orienta atu prepara kedas ai-oan no distribui ba komunidade, liu-liu sira ne’ebé hela iha estrada ninin no iha rai mamuk, nune’e bele utiliza ho produtivu.
“Ita tenke prepara fini ne’ebé di’ak, kuda, no kuidadu ho badinas. Se ita jere ho di’ak, rezultadu sei aumenta rendimentu família nian iha futuru”, esplika Xefe Aldeia Que-Rudo.
Reprezentante ida husi, Asistente Diretór Inspesaun ba Munisipiu Ainaro, Vasco Gomes de Araújo, ne’ebé reprezenta Prezidente PAM Ainaro, hato’o ninia apoiu tomak ba programa ne’e. Nia fiar katak kuda ai-apronos no ai-masan aliña ho programa governu nian atu enkoraja partisipasaun ativu iha setór agrikultura no utiliza rai mamuk ho produtivu.
“Se ita kuda ohin, aban ema bele kolleita no fa’an produtu iha merkadu. Ida ne’e hanesan investimentu longu prazu ida ba ekonomia povu nian”, nia hatete.
Programa ne’e ho objetivu atu halo Hatubuilico, espesifikamente Aldeia Queo-Rudo sai sentru ba produsaun apronos no masan iha futuru. Ho komitmentu hamutuk husi governu, lideransa tradisional sira, no komunidade, hein katak area Builico sei nakonu ho ai apronos produtivu no fo benefisiu sustentavel ba jerasaun futuru.
Lansamentu kuda ai-oan apronos no masan simboliza espíritu kooperasaun mútua entre komunidade Queo-Rudo hodi dezenvolve suku liu husi agrikultura no konservasaun ambiente iha futuru .
Jornallista : Sandra/Cristina
Editor: Clementina Fatima
