Ainaro Lian Orluli-12-09-2022- Komunidade Aldeia Hatumeta-Udu, Bauhati-Lau no Canudu, Suku Manutasi Postu Administrátivu Ainaro Munisípiu Ainaro, durante tinan 20 resin konsumu de’it be’e possu no bee moris iha Be’e Matan.
Alende ne’e sidadaun balun tenki kondus motorizada hodi lalin be’e husi mota Mau-Mali kuaze kilo metru ida resin hodi ba to’o Suku Manutasi, nune’e bele konsumu.
“Ami ba kuru be’e ne’ebé do’ok husi ami nia hela Fatin, no be’e ne’ebé mak ami konsumu uza bee matan ne’ebé moris iha rai kuak inklui bee possu. Tamba ne’e ami husu ba governu atu dada bee moos ba komunidade bele uza hodi konsumu no fase ropa”, esplika abitante Filomena Castro, ba jornalista sira Segunda (12/09/22) iha área Bee matan Manutasi.
Alende ne’e Belarmeno Pereira Barros, hateten durante ne’e konsumu de’it bee possu ne’ebé mak kee iha uma oin hodi fase ropa no hodi tein.
“Tamba ne’e hanesan sidadadun ida hakarak husu ba governu atu bele tau matan ba ami povu no dada hela bee moos ba ami komunidade Manutasi bele hetan mós hanesan maluk sira iha Ainaro villa”,dehan Belarmeno Pereira Barros.
Iha parte seluk Xefé Suku Manutasi Manuela da Silva Caldas hateten, total Populasaun 300 resin kompostu husi Aldeia Hatumeta-Udu , Bauhati-Lau no Canudu ne’ebé durante ne’e la asesu ba be’e moos.
Maibé komunidade sira ne’ebe mak hela besik be’e matan ne’e entaun sira kuru hodi uza , no sira ne’ebe mak do’ok husi be’e matansira ne’ebe mak kbi’it to’o entaun sira tenki bolu Bombeiros tula be’e lori mai, sira ne’ebé mak kbi’it la iha tenkilori motorizada mak sira tenki lori motorizada mak ba lalin to iha mota mau-mali nian”, Manuela da Silva Caldas hakotu.
Editor : Lian Orluli
