Lian Orluli – Prezidente interinu Autoridade Munisípiu Ainaro Ruivu Magno Barros Husu Ministeriu Transporte komunikasaun liu husi Diresaun Nasionál Transporte Terreste atu loke Sub-DNTT iha Munisípiu Ainaro hodi fasilita komunidade sira tanba Ainaro sai sentru ba Munisípiu Manufahi, Suai no mós Aileu.
” Husu ba DNTT estabelese ‘caban’ ida iha Munisípiu Ainaro atu nune’e bele atende postolu administrativu ha’at, ema ne’ebe mak lori kareta no motor iha postu administrativu Ainaro, Hato-Udo, Maubisse, Hato-builico nomós ami “, AMA ne’e husu.
Komandante PNTL Munisípiu Ainaro Supertendente Asistente Luis da Silva mós rekomenda atu DNTT bele loke Sub -DNTT ida iha Munisípiu Ainaro hodi fó atendementu ba komunidade liu-u kondúz nain sira husi Cova-Lima Manufahi no Aileu tanba Ainaro sai sentru
“Husu ba DNTT, atividade ida ohin labele atu para de’it iha ne’e tanba Ainaro iha joven 80 mil ital, ho nune’e atividade hanesan tenki hala’o bebeik nune’e bele prense rekejitus ne’ebe mak governu fó sai kona-ba ema ne’ebé mak uza kareta ho motor tenki iha karta kondusaun, tanba fulan Outubro ne’e ita hala’o durante loron 10 maibé tenki iha kontinuasaun atu ba oin estabelese mos Sub-DNTT ida iha Ainaru, tanba Ainaro mak sai Sentru ba Munisípiu Kovalima, Manufahi, Aileu inklui Ainaro rasik”, Dehan komandante ne’e.
Hatán ba ejijensia sira, Diretora Nasionál DNTT Maria Antónia Vitor dehan dau-daun ne’e iha hela planu atu estabelese Diresaun munisipal transporte tereste iha munisipiu sira inklui Ainaro maibe sei prevé orsamentu iha tinan 2025
“Tanba ne’e DNTT iha ona planu no preve ona osan ba iha 2025 atu loke tan diresaun Munisípal Transporte komunikasaun iha Munisípiu lima; Ainaro, Ermera, Liquica, Aileu no Manatutu, durante ne’e seidauk estabeles tanba iha kestaun ida mak Ainaro tenki ba trata iha Munisípiu Manufahi, ho distansia ne’ebé dok no gastu ne’ebé mak bo’ot, tanba ne’e mak governu prevé ona osan nune’e iha 2025 ita bele establese ona hodi fasilita komunidade sira iha Munisípiu Ainaro”, Nia hakotu.
Tuir observasaun daudaun ne’e komunidade maioria kondús veíkulu lai karta kondusaun no idade seidauk to’o maibe tuir lei idade 17 ba leten mak bele kondúz veíkulu sira
Jornalista : Sara Lewis
Editor: Lian Orluli
