Lian Orluli, Ainaro, 2 Novembru 2025 – Iha ambiente silénsiu no devosionál, komunidade Katólika Parókia Ainaro hala’o Misa Finál iha Semitériu Públiku Ainaro, ho hamatek
Misa ne’e Prejide husi Padre Pároku Ainaro, Albety Franco Morato konvida sirani sira atu hakle’an sira-nia fiar liu husi orasaun ba sarani sira hotu ne’ebé mate ona nia klamar no atu hafoun sira-nia kompromisu atu harii dame iha komunidade Ainaro nia laran.
Iha ninia omilia, Padre subliña katak orasaun ba matebian la’ós tradisaun de’it, maibé espresaun domin no fiar nian ne’ebé liga ema iha rai ho sira ne’ebé hakotu ona mundu. Nia mós fó sai katak importante atu hametin maluk fiar-naʼin sira-nia relasaun nuʼudar maun-alin neʼebé loos.
“Ita sira iha ne’e la’ós de’it atu reza ba matebian sira, maibé mós atu reza ba malu bainhira ita sei moris. Hodi perdua no hadomi malu, ita ajuda lori Kristu nia dame ba Ainaro,” Padre hatete iha nia omilia.
Hafoin Missa remata sarani lori ai-funan no lilin sira nu’udar símbolu esperansa no orasaun nian. Misa hala’o ho solene, akompaña ho knananuk espirituál, hodi aumenta atmosfera refletiva.
Hafoin Eukaristia, padre hala’o prosisaun hale’u semitériu, hodi fo bensaun ba ai-funan sira no reza ba família sira ne’ebé mate ona.
Selebrasaun Missa Finado tinan ida ne’e sai hanesan momentu espesiál ida ba Parokianu Nosa Senhora de Fátima Ainaro atu hametin solidariedade, hakle’an sira-nia fiar, no afirma espíritu dame nian iha sosiedade ne’ebé diversu.
“Orasaun no hamutuk ida-ne’e permite ita atu sai ema ne’ebé halo dame iha ita ida-idak nia komunidade sira,” padre ne’e hakotu ho esperansa.
Iha selebrasaun Missa ne’e to remata hala’o ho hakmatek, tanba hetan seguransa masimu husi Comando PNTL Ainaro no apoiu seguransa husi F-FDTL
Ekipa Redasaun
