Lian Orluli— Ministeriu Solidariadade Sosial no Inkuzaun, liu husi NSSI, halo ona pagamentu ba Idozos no Invalido sira iha Munisipiu Ainaro, maibe benefisiariu ida ho kondisaun defisiensia labele simu nia Direitu ne’e tamba hakdasak deit iha rai no nia uma dook.
Ba Mídia Lian Orluli, Benefisiariu naran Paulino ho kondisaun defisiensia ain informa katak nia laiha kbiit atu ba trata Bihlete de Identidade tamba nia kondidaun lao ladiak, hakdasak deit iha rai no nia uma dook tebes husi Notariadu Munisipiu.
“Ha’u la iha Bilhete de Identidade, tanba ha’u ho kondisaun difisente ain, la’o tenki hakdasak deit iha Rai, ho nune’e mak ha’u labele ba trata Bilete de Identidade tamba Notariadu ho distransia dok husi ha’u nia uma, tanba ho nune’e mak ha’u labele foti osan ne’e” Benifisiariu Paulino husi Soro, ho triste dehan ba lian Orluli.
Iha sorin seluk Xefe Suku Manutasi Manuela Caldas hato’o mos Relatóriu, katak benifisiariu Idozos iha suku Manu-tasi hamutuk 191 nee iha ema nain 50 mak la simu osan tanba laiha kartaun bileti de identidade (BI), kuaze ema ho kondisaun difesiensia no moras struk, moras tilun, inklui moras matan.
“Pagamentu osan idozos hala’o husi dia 16, iha Suku Manu-tasi total benefisariu 191, husi benifisiariu sira ne’e nain 50 la simu tanba la trata Bilite Identidade, balu iha forsa mai trata, rasik, hanesan certidaun oan sira bele mai hasai maibe ba dokumnetus Bilete Identidade ne’e sira nain tenki mai rasik. Husi ne’e benisfisiariu sira balun difisensia ka moras struk, moras tilun, no mos matan, tanba ne’e susar tebes ba sira hodi trata dokumentus BI ne’e” Dehan Xefe Manu-tasi, Manuela Caldas.
Iha okaziaun hanesan kordenador Regionál NSSI argumenta katak benefisiariu ne’ebé laiha kartaun Bilhete de Identidade sedauk bele simu osan tamba ne’e kriteria husi Banku Centrál.
“Diresaun Sosiál ne’e halai liu ba iha valides ne’e dirizi ba iha ferik ho katuas sira no Invalides ne’e dirije ba iha ema ho difisensia , maibé ema ne’ebé mak atu hetan sira nia direito tenke iha Kartaun Eleitoral, Bilhete de Identidade (BI), konta bankaria, iha failansu tanba benefisiariu balun la iha Bilete de Identidade, ho nune’e mak benefisiariu balun seidauk hetan sira nia direito”. Antonio Pereira Araújo hatoo ida ne’e iha nia knaar fatin , segunda-feira, 21/08/2023.
Enkuantu prosesu pagamentu osan ba valides no invalides sira ho montante $ 50.00 kada fulan ne’e kobre fulan 6 nian, nunee ema ida simu nia osan fulan ne’en hamutuk $ 300.00, pagamentu nee halo direta husi BNCTL ne’ebé realiza iha kada Suku iha teritoriu Timor laran tomak dezde loron 16 fulan Augusto to’o ohin loron.
Fo hanoin fali katak Estado Timor-Leste kompromitidu hodi ratifika ona Konvensaun ba Ema ho Defisiensia iha tinan 2022, nune’e estadu presiza tebes kria kondisaun ba ema ho defisiensia sira, atu sira bele asesivel no goza sira nia Direitu sira ne’ebé mak iha.
Jornalista : Reni/Marcya
Editor: Orluli News
