Lian-Orluli, 27 Fevereiru 2026– Banco Nacional de Comércio de Timor-Leste (BNCTL) hatudu kompromisu ba responsabilidade sosiál hodi harii uma ba kbi’it laek Nain Tolu ne’ebé laos Familia Fen ho Laen mabe’e Feto ho Nan husi suku Fatubessi,Postu Administrativu Maubisse.
Prezidente Ezekutivu BNCTL, Marcelo da Cruz Carvalho, afirma katak nu’udar instituisaun bankária nasionál, BNCTL la’ós de’it iha misaun komérsiu maibé iha mós misaun sosiál, ne’ebé tinan-tinan kontinua hala’o.
“Banku ne’e iha misaun komérsiu no misaun sosiál programa ne’e tinan-tinan la’o, inklui halo uma ba kbi’it laek sira, uma ba kbi’it la’ek sira la’ós harii de’it iha Maubisse, maibé mós iha munisípiu sira seluk,” dehan Prezidente Ezekutivu BNTCL.
Nia subliña mós ba kompañia implementadór atu harii uma sira ne’e ho responsabilidade, garante kualidade konstrusaun ne’ebé di’ak no padraun atu garante ho kualidade ba benefisiáriu sira.
Iha fatin hanesan Xefe Suku Fatubessi Bonifacio Pereira Mendonca hato’o apresiasaun no agradesimentu ba BNCTL nia atensaun no apoiu ba komunidade kbiit laek sira iha area rural.
“Ha’u agradese tebes ba BNCTL nia apoiu ba komunidade kbiit laek na’in tolu ne’ebé besik atu desesperadu no hein Ita nia tulun. Ohin, BNCTL realiza ona programa sosiál ne’e hodi harii uma ba ema kbiit laek na’in tolu,” hatete Xefe suku Bonifasio.
Uma ho medida metru kuadradu 6×7 no kompostu hosi kuartu rua, sala ida, haris-fatin ida, no dapur ida. Totál orsamentu ba konstrusaun hamutuk US$21,300. Uma ne’e sei halo husi kompañia konstrusaun ZEVICIA LDA.
Programa ida ne’e hatudu BNCTL nia kompromisu hodi apoiu komunidade sira, liu-liu ba família sira ne’ebé kbi’it laek iha área rurál.
Jornalista Lucia/Fanesia
Editor : Clementina Fatima
