Ainaro Lian Orluli— Diretúr kompaina sunrise, Manuel de Araújo simu ona pose hodi lidera prezidente kamara komérsiu industria Timor-leste munisípiu Ainaro, ba periodu 2023 to’o 2027
Iha sesta semana ne’e Kamara komérsiu industria Timor-leste, CCI-Tl hala’o konfrensia ba da tolu iha munisípiu Ainaro hodi hili prezidente CCI-Tl munisípiu Ainaro ninian ba periode 2023-2027
Tamba ne’e liu husi konfrensia, konkresista sira mai husi emprezariu lokal husi Munisípiu Ainaro, desidi Manuel de Araújo, atual diretúr kompaiña Sunrise Unipesoal Limitada avansa ho pakote uniku hodi lidera fali prezidente CCI munisípiu Ainaro, nune’e hodi troka prezidente CCI sesante Tarceiso Mota, ne’ebé lidera CCI munisípiu Ainaro hahú iha tinan 2010 to’o iha loron 27 fulan janeiru tinan 2023
Hafoin eleitu sai Prezidente CCI munisípiu Ainaro, Prezidente CCI-Tl Jorge Manuel Serrano, fó posse kedas ba Prezidente CCI munisípiu Ainaro Manuel de Araújo.
Prezidente CCI eleitu ba munisípiu Ainaro Manuel de Araújo, agradese ba konkresista sira ne’ebé deposita ona konfiansa ba nia hodi lidera CCI Munisípiu Ainaro
Prezidente CCI munisípiu Ainaro Manuel de Araújo, reafirma nia posizaun hodi husu ba Governu atu kria dekretu lei ruma hapara sidadaun xineza loke kioske, iha fatin-fatin, to’o tempu ruma Timor oan asiste de’it
“Timor oan labele asiste deit bainhira xineza sira mai loke kioske iha ita nia rai laran, no hau Promete sei husu ba Governu atu Kria lei ruma hapara sidadun xineza loke kiaoske iha fati-fatin,” Prezidente CCI eleitu munisípiu Ainaro, Manuel de Araújo, hatete ihania deskursu
Iha Tomada de pose ne’e Prezidente CCI-Tl Jorge Manuel Serrano, fó parabens ba prezidente CCI munisípiu Ainaro eleitu, ho estrutura na’in rua ne’ebé simu ona posse, no nia husu atu rejista emprezariu iha munisípiu Ainaro, bainhira Governu iha intervensaun ruma CCI-Tl bele iha ona dadus
“ Presija atu rejista emprejaria sira ne’ebé ejiste iha Munisipiu Ainaro atu nune’e bainhira Governu halo intervensaun ruma, ita iha ona dadaus,”. Prezidente CCI-Tl Jorge Manuel Serrano, hateten
Nune’e Jorge Manuel Serrano mós husu ba CCI munisípiu Ainaro atu hasa’e produsaun rai-laran halo komérsiu ho industria tamba Ainaro potensia ba setór turizmu no agrikula.
Iha tempu hanesan Sekretáriu Estadu Formasaun Pólítika Empregu ne’ebé lee sai diskursu Ministru Koordenador Assuntu Ekonomi nian nafatin husu ba CCI-Tl depende nafatin ba Governu nia pólítika atu nune’e dada investedores mai investe iha Ainaro
Antes ne’e mós Prezidente CCI-Tl Jorge Manuel Serrano fó ona Posse ba estrutura CCI- munisípiu Covalima no tuir planu iha sabadu Prezidente CCI-Tl sei kontinua nia viazen ba Same hodi fó posse ba estrutura CCI-munisípiu Manufahi
Editór : Lian Orluli
