Lian Orluli—Estudante Jefania De Jesus Freita tinan 10, eskola iha EBC Boramba, suku Foho Ailico, kanek grave tamba be’e lori husi valeta kuaze distansia metro 50, rejulta kanik grave iha ain inklui mos ho kotuk laran tanba hetan pankada makas ba moru valeta nian.
Tuir kronologia ne’ebe haktuir husi familia katak, loron segunda dader 3/07/2023, Jefania halo aktividade hanesan babain ba eskola, no la espera ho asidente ne’e, tanba laiha sinal ruma no senti hanesan babain, derepenti rona informasaun katak Jefania be’e lori iha eskola.
“Ami mos la hanoin katak atu hetan dezastre hanesan ne’e derepenti ami simu informasaun katak be’e lori hau nia oan feto, ho paniku tebes ami hotu halai ba hare’e hau nia oan ne’e grave tebes, sorti bo’ot nia hetan tulun lalais husi maluk komunidade sira ne’ebé hela besik, konsege salva hau nia oan husi be’e lori. Ami la espera ho akontesimentu ne’e labarik sira baibain husi uma la’o ba eskola hanesan loron baiban, maiske tempu udan, tuir informasaun husi nia kolega sira haktuir katak iha tempu ne’e Jefania fase ain iha valeta, derepenti be’e tun ho korente makas hodi rejunta Jefania Monu no be’e lori Jefania kuaje metru 50, hafoin nia kolega sira ne’ebe la’o tuir husi kotuk maka hetan ho hakilar maka’as “be’e lori Jefania be’e lori Jefania,” ho nune’e maka komunidade rona hodi halai ba konsege hasai Jefania husi valeta be’e boot ho korenti makas tebes,” haktuir inan husi Jeofania, Sejaltina Freitas, ba lian Orluli iha nia rezidensia Boranba, bainhira Ekipa Konjunta ba vijita familia afetadu.(7/7/2023)
Sejaltina Freitas triste tebes hare’e oan feto Jeofania kondisaun trauma depois hetan ansidente ne’e.
“Triste lo’os hare’e ba hau nia oan nia kondisaun hanesan ne’e agora nia trauma makas tebes, hafoin akontese asidente ne’e,” haktuir Sejaltina ho triste
Husi udan intensidade maka’as durante loron 3 nia laran halo erosaun ho hamosu inudasaun, inklui komunidade barak nia uma no plantasaun hetan estragus hotu, nune’e mos infrastrutura Públiku estrada kuaje kotu barak.
Ho situsaun desatre naturais ne’e, atoridade Munisipiu Ainaro Levegildo Amaral, konvoka kedas reuniaun urzenti, hodi responde Emerjensia ba komunidade afetadu sira iha terenu, inklui vijita mos ba estudante inosente Jeofania Freitas hodi hare direta kondisaun iha nia rejidensia Boramba suku Foho-Ailicu postu administrativu Hato-udu, nune’e mos komunidade afetadu sira iha suku manutasi, inklui organija makina pejadu ateru estrada Bolbeta ameasa kotu.
Editor : Lian Orluli
