Lian Orluli, Hato-Udu— Kompromisu Militár Besik ba Povu Ainaro, Komandu FALINTIL–Forsa Defeza Timor-Leste (F-FDTL) ofisialmente konklui Ezersísiu COBRA 2025 durante loron sanulu iha Munisípiu Ainaro no konklui ezersísiu iha Postu Administrativu Hatu-Udo, Suku Foho-Aulico, Aldeia Raimerlau, Munisípiu Ainaro.
Atividade ne’e sai nu’udar oportunidade krusiál ida hodi hametin relasaun entre militár no povu no hametin espíritu devosaun ba nasaun. Iha serimónia enseramentu ne’e, Xefe Estadu Maior Jenerál F-FDTL, Tenente Jenerál Domingos Raúl Falur Rate Laek, hato’o ninia apresiasaun no mensajen profundu relasiona ho importánsia husi ezersísiu ne’e. Sex (23/10/25)
“Ezersísiu COBRA 2025 hanesan manifestasaun konkreta ida hosi ita-nia kompromisu no responsabilidade institusionál ba nasaun”, nia hatete.
“Ha’u nia agradesimentu kle’an ba Munisípiu Ainaro tanba simu ona militár nu’udar imi-nia oan sira. Promesa fiar ida-ne’e hametin lasu ne’ebé labele haketak entre ita-nia Forsa Armada sira no povu Timoroan tomak.”
Tenente-Jenerál Falur Rate Laek subliña katak atividade Kooperasaun Sivíl-Militár (CIMIC) oioin ne’ebé hala’o durante ezersísiu,inklui asaun sosiál, servisu psikososiál, no kuidadu saúde ba labarik sira,la’ós de’it halo parte iha misaun defeza nian maibé mós manifestasaun tanjível ida hosi preokupasaun F-FDTL nian ba povu.
“Ami nia asaun sira CIMIC nian hatudu la’ós de’it kumprimentu hosi ami nia misaundefeza nian. Sira mós hatudu ami nia apoiu ba ami nia povu iha sira nia tempu nesesidade nian. Ida-ne’e maka karakterístika ne’ebé distinge ami iha serbisu ba ami nia nasaun doben”, nia hatutan.
Entretantu, Prezidente Autoridade Munisipiu Ainaro,Manuela Carmo Bucar Corte-Real hato’o nia apresiasaun ba membru F-FDTL tomak ne’ebé hala’o ona formasaun ho dedikasaun no lori impaktu pozitivu ba komunidade lokál.
“Ezersísiu ne’e la’ós de’it atu hasa’e ita-boot sira-nia abilidade no kapasidade, maibé mós atu hametin lasu amizade entre militár no komunidade, atu nune’e ita hatene sé mak tropa sira ne’e—tropa sira ne’e mak ita-nia oan sira ne’ebé iha ne’ebá atu serbí komunidade,” nia dehan.
Nia hatutan, F-FDTL nia prezensa iha rejiaun Ainaro lori mensajen importante ba jerasaun foun sira. “Imi nia prezensa hato’o mensajen furak tebes mai ami. Ho atividade karidade ida ne’e, ami hein katak atividade ida ne’e sei la hakotu imi nia prezensa iha Ainaro, ajuda governu no fahe imi nia esperiénsia iha servisu, nune’e mós hato’o mensajen ne’ebé di’ak liu ba ita nia jerasaun joven sira atu hadomi rai ida ne’e.”
“Nasaun ida ne’e la’ós fásil, maibé agora daudaun ita hala’o hela prosesu ida ne’ebé naruk tebes”, tenik nia.
Enserramentu Ezersísiu COBRA 2025 marka susesu F-FDTL nian iha implementasaun programa formasaun ne’ebé la’ós de’it hasa’e profisionalizmu no prontidaun tropa sira-nian, maibé mós hametin relasaun armonioza entre militár no povu, pilár xave rua hodi mantein Timor-Leste nia soberania no dezenvolvimentu nasionál.
Jornalista : Carla/Lucya
Editor : Clementina Fatima
