Lian Orluli — Iha Ainaro mosu tan fitun foun ida, expresa talentu liu husi lian no hananu ne’ebé oras ne’e sai inspirasaun ba jerasaun foin-sa’e Timor-Leste nian. Nia mak Eudózia Osório, labarik-feto ida ho tinan 21 ne’ebé moris iha loron 8 fulan-juñu tinan 2004, iha Suku Mau-ulo, postu Administrativu Ainaro.
Oras ne’e daudaun, Eudózia hala’o hela estudu iha Universidade Nasionál Timor-Leste (UNTL), ho espesialidade Siénsia Médika Jerál. Husi bata mutin nia helik, ne’ebé nia sei uza loron ida nu’udar futuru médiku, maibé Eudózia mós iha lian osan-mean ne’ebé lori nia ba kompetisaun múzika iha nasaun Timor-Leste. Nia viajen muzikál la’os hahú foin lalais ne’e. Iha tinan 2019, Eudózia kapta públiku nia atensaun ho atuasaun impresionante ida iha The Voice Timor-Leste, iha ne’ebé nia hakat to’o finál. Husi ne’ebá, nia hahú hetan rekoñesimentu nu’udar feto-klosan talentu ida ne’ebé lori esperansa foun ba nia Munisípiu liu husi palku múzika.
Ho determinasaun ne’ebé la nakdoko, iha tinan 2025, Eudózia hakat ba oin ho fiar-an iha époka daruak Kompetisaun Bosconians MEHI Voice (BMVC), kompetisaun prestijiadu ida ne’ebé fó plataforma ba talentu foin-sa’e Timor-Leste nian atu nabilan. Liu hosi palku ida-ne’e, Eudózia la’ós kanta de’it nia konta istória, mehi, no inspirasaun sira.
“Ha’u hakarak lori Orluli Ainaro nia naran ba mundu liu hosi múzika,” Eudózia hatete ho esperansa.
Nia mehi atu sai kantora profisionál ne’ebé koñesidu la’ós de’it iha Timor-Leste maibé mós iha palku internasionál.
Eudózia sempre simu mensagen husi nia Mama no Papa, Osório Araújo no Ofélia Araújo nia oan-feto, ho paixaun no mehi boot ne’ebé nia haburas husi ki’ik,
Nune’e mós eudózia sempre iha esperansa ida ,“ daqui á 10 anos, Timór sei iha ita joven sira nia liman, ida ne’e sai hanesan menssagem ida ne’ebé klean tebes ba juventude sira hotu iha Timór laran tomak, especialmente juventude município Ainaro, entaun arte no música ne’e sai hanesan parte ida husi desenvolvimento humana, ne’e passo ida ne’ebé precisa ema hotu atu tau atenção” Eudózia Afirma
“orgulho ba nia luta, tamba ida ne’e mak Eudózia nia mehi, bainhira nia sei iha idade criança 12 anos, nia mehi ona hakarak atu sai artista ida para bele fo mos ninia contribuição ba rai ida ne’e liu husi mundo música, no ida ne’e sai hanesan motivação katak luta atu atinge mehi ida ne’e la fácil, ninia processo ne’e todan no sei hakat ho desafios oioin, no ida agora dadauk Eudózia hala’o hela ne’e hanesan atu fo exemplo de’it ba nia maluk sira ne’ebé sei hamriik iha nia kotuk no ida ne’ebé hamriik hamutuk ona ho nia maibé la iha vontade atu hatudu sira ninia potencia, no hirak ne’ebé mak karik iha ninia oin hakarak halo fila fali buat ne’ebé hanesan Eudózia halo, mak ida ne’e sei justifica katak Ainaro daqui á 10 anos sei sai furak liu tan iha oan foinsa’e sira nia liman ho especialidade ne’ebé sira ida-idak iha”.(dehan nia Papa, Osório Araújo)
Eudózia nia partisipasaun desde iha 2025, la’ós de’it konkursu talentu ida, maibé pasu konkretu ida hodi buka tuir mehi ida ne’ebé nia hafolin kleur ona. Hamutuk ho nia kolega sira iha palku, Eudózia hein atu kontinua haburas buras, aprende, no sai ema ida ne’ebé forte liután, la’ós de’it nu’udar múzika maibé mós nu’udar mudansa inspirasaun ida ba nia feto maluk iha nia rain doben. Iha nia laran, nia lian no espíritu kahur makas kahur, reprezenta esperansa, dedikasaun, no orgullu ba Ainaro nia kultura.
No iha nota, ida-idak ne’ebé nia hananu, fo naroman hanesan fitun foun ba labarik-feto ida hosi Ainaro nia mehi sira ne’ebé nabilan, prontu atu konkista mundu.
Jornalista: Ekipa Lian Orluli
Editor: Clementina Fatima
