Lian Orluli – Funsaun Públiku hamutuk ho Provedoria ba Direito Humanus no Justisa (PDHJ) fasilita formasaun lei no kódigu étika ba funsionáriu públiku iha postu administrativu Ainaro hodi hasa’e sira nia koñesimentu atu bele kumpre sira nia devér no evita asédiu sexual.
Komisáriu Asuntu Dixiplinár da komisaun Funsaun Públiku, Fausto Freitas da Silva, hatete, objetivu husi formasaun ne’e atu hasa’e koñesimentu ba funsionáriu públiku sira kona-ba lei no kódigu étika atu funsionáriu sira bele evita-an husi asédiu sexual iha servisu fatin no mós iha fatin públiku.
“Objetivu formasaun ne’e atu hasa’e koñesimentu ba Funsionáriu Públiku sira kona-ba Lei Funsaun Públiku no mós Kódigu Étika, atu nune’e sira bele komprende no hatene loloos saida mak sira nia devér liga ho servisu nian iha fatin ne’ebé de’it no mós direitu ema ida-idak nian atu nune’e funsionáriu sira bele servisu ho di’ak iha ita rai Timor hodi atinji ba ita boa-governasaun,” Faustino informa iha salaun postu administrativu Ainaro Villa, Kuarta (26/04/2023).
Aleinde ne’e, Faustino informa liután katak, durante ne’e PDHJ rejista kazu hamutuk 20 mak investiga ona iha postu administrativu 36 iha territóriu Timor laran tomak.
“Kuaze iha territóriu Timor laran tomak kompostu husi postu administrativu 36, iha kazu investigasaun hamutuk 20 no kazu seluk seidauk investiga,” nia hatutan.
Iha fatin hanesan, Delegasaun territóriu Same Diretora PDHJ, Francelina Tilman, hatete, PDHJ nia knaar hanesan direitu umanu atu foti asaun bainhira funsionáriu públiku kontra kódigu étika no lei funsaun públiku iha servisu fatin no uza patrimóniu estadu nian la tuir regra no lei vigóra ona.
“Knaar PDHJ nian liga ba funsaun públiku atu foti asaun bainhira funsionáriu ne’ebé mak kontra lei no kódigu étika funsaun públiku iha servisu fatin no ba fatin públiku inklui mós uza patrimóniu estadu nian la tuir regra ne’ebé vigóra ona, atu nune’e sira bele hala’o servisu ho di’ak liu tan iha fatin ne’ebé de’it, atu nune’e funsionáriu sira labele hatán ba funsaun públiku,’’ nia hateten.
Francelina dehan, PDHJ iha forma ona ekipa hodi tun ba iha terenu hodi halo monitorizasaun ba iha kampaña eleitorál karik iha tempu servisu mak funsionáriu públiku sira balun partisipa iha kampaña ba eleisaun parlamentár nian.
“Iha kampaña eleitorál nian Funsaun Públiku hamutuk ho PDHJ no CAC, sai hanesan ekipa ida hodi hala’o monitoring ba iha tempu kampaña eleitorál atu funsionáriu públiku labele partisipa iha horas servisu nian,” nia hatutan.
Enkuantu, formasaun ne’e hala’o durante loron rua iha salaun postu administrativu Ainaro, partisipa másimu husi xefe suku no liña ministériu sira inklui mós funsionáriu públiku no iha loron ikus sei distribui mós sertifikadu hanesan rekoñesimentu.
Editór : Lian Orluli
