Lian Orluli – Benefisiáriu ba Programa Mão de Obra Postu Administrativu (PMOPA) husu ba Governu foun atu aumenta orsamentu, tanba kada loron Osan 5.00 USD la sufisiente atu sustenta família.
Benefisiáriu Antoneta da Silva husi suku Soro, postu administrativu Ainaro, husu ba Governu foun atu servisu PMOPA kontinua nafatin no hasa’e orsamentu hosi 5.00 USD ba 7.00 USD kada loron.
Benefisiáriu Antoneta da Silva
“Husu ba partidu polítiku sira ne’ebé mak manan iha Eleisaun Parlamentár tinan 2023, atu Governu foun nafatin kontinua servisu PMOPA atu nune’e ami povu bele servisu no mós ha’u nafatin husu ba Governu foun atu aumenta orsamentu PMOPA 5.00 USD sa’e ba iha 7.00 USD, tanba osan 5.00 USD de’it la sufisiente mai ami no ami iha oan barak mak sei eskola,” nia hateten ba jornalista Orluli iha Ainaro, Kinta (11/05).
Tuir nia, benefisiáriu hosi programa PMOPA ne’e iha oan barak mak eskola, entaun husu ba Governu foun labele atu hapara servisu PMOPA nian, maibé tenke kontinua nafatin nune’e bele fó servisu ba ema ne’ebé laiha servisu.
“Governu foun tenke kontinua nafatin servisu PMOPA, tanba servisu ida ne’e ami povu bele hetan osan uitoan hodi selu ami nia oan ba eskola, no orsamentu ne’ebé mak hetan seidauk sufisiente,” nia dehan.
Enkuantu, benefisiáriu sira hosi programa PMOPA ne’e hahú hala’o servisu iha dadeersan tuku 08:00, depois deskansa han meiudia iha tuku 12:00, no tama fali iha tuku 02:00 no remata iha tuku 05:00 lokraik.
Editor : Lian Orluli
