Lian Orluli— Faluk Cristina do Rosáriu idade 80 hela iha area Kotpere, Suku Ainaro Postu Administrativu Ainaro, Munisipio Ainaro, durante ne’e hela ho nia oan Manuela do Rosário ne’ebé ho kondisaun difesiensia Ain.
Faluk Cristina iha oan nain rua Mane Ida no feto Ida. oan mane naran Antonino do Rosário no Oan feto naran Manuela do Rosário, Manuela ho nia kondisaun difesiensia Ain,
Durante ne’e Manuela maka hela hamotuk ho nia Mama Cristina. Maske sira rua hela iha vila Laran, durante ne’e la asesu eletrisidade, valeta maka dalan ba sira rua hodi liu ba mai no hakat ba estrada sorin.
Ho idade Avansa ona, faluk Cristina sempre hetan moras oin-oin, isin manas, ulun moras, no mear to’o lao mo’s araska, tanba ne’e inan faluk Cristina triste kuando hare nia oan Manuela.
” Hau la tauk atu Nai bolu hau ohin ka aban, maibe hau tauk liu, hau nia oan Manuela ema la hare,” Dehan inan faluk Cristina ba Lian Orluli iha nia rezidensia,(29/7/23)
Inan faluk ne’e la tauk atu nai bolu nia, maibe nia tauk liu, nia oan feto mesak Manuela ema la hare, tanba Manuela nia kondisaun. difesiensia hela.
Maske Manuela iha ona oan nain tolu. Manuela laran la metin ba nia oan sira atu koidadu nia.
” So hau nia Mama maka hadomi hau laiha rohan, nia sempre hamotuk ho hau, bainhira ema hotu despreja hau, nia la husik hau, mama mai kaer hau nia liman atu ami rua lao hamotuk no hakat pasu hanesan hodi lao ba oin, bainhira nia laiha ema seluk bele hare hau hanesan hau nia Mama ne’e ga lae?,” Manuela hatete ho hamonu matawen.
Inan faluk Cristina iha oan mane ida, maibe hela dook husi sira hodi buka moris. maske iha oan mane ho bei-oan maibe inan faluk Cristina laiha komfiansa ba sira hodi tau matan ba nia oan Manuela.
Cristina ho Manuela antes ne’e hela iha Suku Suro-Craik, Postu Administrativu Ainaro, ho kondisaun faluk no idade mos avansa ona, Inan faluk nain rua hetan tulun husi subrinho José, halo uma iha Ainaro kotpere ho medida 7×9, iha kuartu rua no sala ida inklui mo’s iha varanda, hela iha fatin ne’e durante tinan 17 ona.
“Iha momentu tinan 1987, hau sei Lori kareta halai ba iha Suku Suro-Craik, hare hau nia tia ho feton Manuela ne’e kondisaun ferik ona no Ida mo’s difesiensia hela tanba ne’e hau rasik maka tula lori mai iha fatin ne’e, antes ne’e sira hela uluk iha Suku Soro, hafoin ami halo uma ne’e remata hau rasik ba lori sira mai hela iha fatin ne’e to agora. tanba ho kondisaun idade ona tia sempre halo problema ho ami maibe, ami la preokupa tanba ne’e ami nia tia aban bainrua nia mate, ami mak sei hakoin nia. durante ne’e hau nia tia Cristina maka lakohi simu eletrisidade husi ami, no lakohi liu husi dalan nebe’e ami oferese hela,”. Haktuir Sr. José iha nia residensia Kotpere
Entretantu Faluk Cristina hetan ona tulun nesesidade bazika, husi autoridade munisipio, no grupo Relijioju sira, Inklui familia no vijinho sira.
Maske Inan Faluk Cristina hetan ona subsidiu terseira idade, maibe la to ba nia hodi dada fiu eletrisidade ba nia rejidensia, durante ne’e lampiaun uja minarai maka fo roman ba sira iha tempu kalan, tanba ne’e faluk nain rua husu ita hotu nia tulun.
Halolo netik ita Nia liman hodi hakaman sira rua nia moris, nomos bele hetan roma eletrisidade hanesan.
Editor : Lian Orluli
