Lian Orluli– Prezidente Repúblika José Ramos Horta husu ba inan-aman sira tenke fo aihan lokal ba oan sira hodi fó Nutritivu di’ak ba labarik sira nia saúde atu diminui problema má-nutrisaun iha Ainaro.
Prezidente da Repúblika José Ramos Horta ko’alia asuntu ne’e liu husi nia diskursu sesta (05/08/2022) Iha salaun paroquia Vila Maria Ainaro relasiona má-nutrisaun rejista a’as Iha Munisipiu Ainaro.
“Tanba sá inan no aman sira la aproveita fo ai-han produtu Nasional nia ba labarik sira, no fo maka etu ba labarik sira han loro-loron,nusa la eduka labarik sira konsumo batar,koto, no modo tahan, batar iha nutrisaun makas liu fo’os, no fo aifuan barak ba labarik sira atu nune’e bele hamenus má-nutrisaun, familia sira bele kontribui ba nutrisaun, labele hein de’it governo no NGO sira ne’e imposivel governu atu tama kada familia sira nia uma iha Timor Leste,’’ Prezidente repúbilka suzere.
Relasiona preokupasaun Prezidente da Repúblika kona ba’a má-nutrisaun ne’ebe rejisu as iha Anaro, Jestor Programa Unidade Plan International Munisipiu Ainaro, Valentim Spinola Magno Soares hato’o mos katak Plan Inernational iha komitmentu bo’ot tebes atu servisu hamutuk nafatin ho Governu no Prezidente Repúblika nune’e bele luta hamutuk hodi redús má-nutrisaun ne’ebé a’as iha Timor-Leste liu liu iha Munisipiu Ainaro.
“Hanesan ita hotu-hotu hatene katak fulan hira liu ba Ministeriu Saúde fo sai rezultadu kona ba má-nutrisaun ne’ebé as tebes iha Timor-Leste liu liu iha Munisipiu tolu inklui Ainaro, Ainaro iha urutan ba datoluk nian ne’ebé má-nutrisaun a’as, ho ida ne’e Plan International luta oinsa atu redus má-nutrisaun iha Timor-Leste liu liu iha Munisipiu Ainaro, ami hanoin ida ne’e sai prekupasaun ba ita hotu Plan International iha komitment bo’ot teb-tebes servisu hamutuk nafatin ho Governu ho Prezidente Repúblika no mos entidade hotu-hotu nune ita bele luta hamutuk hodi redus má-nutrisaun a’as iha Timor-Leste liu liu iha Munisipiu Ainaro”. Nia hatutan
Iha parte seluk nia esplika klean katak problema má-nutrisaun ne’e kontribui husi fatór barak no atu redus má-nutrisaun iha Timor-Leste, liu-liu iha Munisípiu Ainaro maka Plan Internasional iha programa integradu sira ne’ebé halo ona dezde Plan International hala’o nia programa iha Munisipiu Ainaro hanesan dada bé mos ba komunidade, organiza grupo Joven sira atividade agrikultura liu husi empoderamentu ba ekonomia joven sira inklui programa PPN (Positive Parenting and Nutrition) ne’ebé foku oinsa hala’o sensibilizasaun ba família kona-ba oinsá prepara aihan nutritivu.
“ Agora dadaun Plan International iha intervensaun lubun ida maka ita hala’o dadauk durante tinan hira kotuk hanesan ita liga ba nutrisaun, má-nutrisaun ne’e la’os mai hosi fator ida de’it maibe iha fatóres barak mak kaúza ba má-nutrisaun ne’e rasik tan ne’e Plan Internasional nia programa integradu hahu ho instalasaun bee ba iha suku rurál sira ne’ebé sira la asesu ba iha bé mós ida ne’e sai hanesan prióridade ida atu kontribui ba redus má-nutrisaun,’’katak reprezentante PLAN Internasional ne’e.
Enkuantu dadus sira ne’ebé públika sai husi unidades oi-oin iha Timor-Leste, tuir nia hanoin katak ida ne’e hanesan preokupasaun no ne’e sai bazeia ba fornesedor servisu sira iha Timor-Leste atu bele servisu másimu.
“ Dadus ida ohin temi ne’e mai husi Ministeriu Saúde sira mak fo rezultadu iha peskiza sira halo iha tinan hira liu ba, hanesan Plan International ami nia servisu mak iha area Munisipiu Aileu no Ainaro, tanba ita rona katak iha Ainaro mos inklui iha má-nutrisaun ne’ebé as entaun ida ne’e sai hanesan preokupasaun ba ita hotu tanba ne’e mak bazeia ba dadus ne’ebé sira fo sai iha media ne’e mak sai hanesan baze ida ba ita atu esforsu maka’as liu tan oin sa ita bele servisu hamutuk ho Ministeriu Saude iha Munísipiu no iha nivel Nasional nian no parseiro sira hotu no mos liga ba kampaña ne’ebé mak sai Prezidente Repúblika nia komitmentu ne’ebé boot teb-tebes atu hodi redúz má-nutrisaun ida ne’e, Plan International apoio inisiativa Prezidente Repúblika nian sein-rezelva ba ida ne’e,’’nia hakotu.
Editor: lian Orluli
