Ainaro Orluli News — Jacinta da Silva (30), sente moris ne’e la fasil atu kontinua wainhira tu’ur de’it, nune’e obrigadu tenki la’o ho distansia 250-km metru ba to’o merkadu hodi fa’an ninia sasan.
Jacinta da Silva ho idade 30 moris hamutuk ho ninia la’en kaben durante tinan barak nia laran, hosi domin ne’ebe harii ho la’en kaben Adriano de Araújo idade 40, sira na’in rua iha oan na’in Haat, feto Rua no mane Rua ne’ebe oras ne’e tu’ur iha banku eskola sekundariu, pre sekundariu, primaria inklui pre primaria.
Jacinta ho ninia la’en kaben ho oan na’in Haat hela iha aldeia Nunumoge Leten, suku Nunumoge, postu administrativu Hatobuiliku.
Maibe, durante iha moris uma kain Jacinta ho oan na’in Haat la imajina atu sofre hanesan agora daudaun akontese, tanba la’en kaben no aman ba oan na’in Haat ne’e sofre moras stroke tinan barak nia laran, nune’e ejijensia ba nesesidade báziku uma laran hakarak ka lakohi Jacinta tenki toma responsabilidade.
Tanba ne’e, Jacinta da Silva atu responde nesesidade báziku uma laran ba han hemu, sosa aimoruk ba la’en kaben ne’ebe moras no oan sira ninia eskola maka tenki halo toos kuda modo lori ba fa’an hodi hetan netik 1 dolar. Maibe, la fasil atu hetan dolar, obrigadu tenki la’o ain ho distansia 25 kilometru hosi hela fatin ba to’o Ainaro villa fa’an produtu ne’ebe nia rasik produs ka kuda rasik.
“Ha’u mak tenki esforsu durante ne’e hodi halo toos, kuda modo hanesan mostarda, senhora, fehuk ropa, alfase, liis me’an, baria, koto, repollu, lakeru tahan depois lori ba fa’an semana ida dala rua iha loron Kinta no Domingu,” Informa Jacinta ba jornalista Orluli, iha merkado lama Ainaro loron (11/11/22)
Fundamenta Jacinta, hosi atividade fa’an produtu sira ne’e dala-ruma hetan $ 10 to’o $ 15, semana ida nia laran. Hodi hatutan moris no responde nesesidade ona sira nia presija, maske dalaruma espasu fatin ba fan nian la iha ba nia atu tur iha merkadu laran, Jacinta tuir deit iha troto’ar leten no iha loro manas nia laran.
Observasaun husi orluli news sita, Produto lokál ne’ebé Jacinta faan maka hanesan lis mean, lis mutin, alfase, senoura, repoilho, fehuk roupa, hudi tasak, tomate, no ai-manas tasak.
Jornalista: Sara lewis/ Uca silva
Editor : Orluli news
