Hakerek Na’in: Francisco J Almeida
Hakerek nain artigu ne’e la representa instituisaun ne’ebé hakna’ar an ba.
Jornalista no kanál mídia nia papél iha periódu kampaña polítika mak atu evita publika notísia no programa ne’ebé nia konteúdu difamatóriu no presupostu. Mídia no jornalista labele publika beibeik alegasaun ne’ebé laloos no hato’o imformasaun falsu sobre kandidatu ruma lahó faktu. Jornalista bele halo reportajen ba alegasaun ruma ne’ebé dalaruma bele afeita ema ruma nia imajen, maibé reportajen ne’ebé nia halo tenke justu no balánsu hodi fó oportunidade ba ema ne’ebé hetan alegasaun atu fó resposta. Jornalista profisionál labele uza sala nia póder hodi públika imformasaun falsu no utiliza imformasaun nu’udar arma pesoál hodi hakanek partidu ou kandidatu ruma. Asaun ida-ne’e nesesariamente tenke foti atu evita konkluzaun sedu husi públiku no evita mídia halo julgamentu (trial by the press) ne’ebé afeita ema seluk nia imajen.
Iha tempu kampaña eleitorál ka eleisaun, jornalista sira tantu husi mídia Estatal Estadu nian no mídia privadu, mídia internasionál sira ou dala-ruma mída alternatriva ba iha tereñu atu halo kobertura ba atividade kampaña polítika atu hakunu sidadaun sira nia direitu ba informasaun. Ida-ne’e, akontese deit iha país demokrátiku sira, liuliu país ida tama iha ámbitu festa demokrasia ka eleisaun. Entaun iha kontestu kobertura no publikasaun, kanál mídia no jornalista sira tenke obdese ba prinsípiu jornalizmu universal no Kódigu Étika Jornalizmu hodi fó espasu ba partidu polítiku hotu-hotu, liuliu mídia públiku hanesan RTTL E.P. no Ajénsia Notísoza Tatoli. Iha periódu polítiku ida hanesan ne’e Polítika Redasaun mak tenke forte no justu oinsa atu halo kobertura no publikasaun ida-ne’ebé loloos tuir prinsípu jornalizmu no Kódigu Étika Jornalizmu. Mídia no jornalista tenke evita halo kobertura no publikasaun ne’ebé favoritiza ka benefisia partidu polítiku balu deit. Aliende ida-ne’e, jornalista ka mídia mós tenke verifika verasidade husi deklarasuan polítika ne’ebé lider polítiku sira hato’o iha kampaña polítika hodi evita kobertura ba hoax no evita publika fake news ne’ebé karik konsidera mós nu’udar “black campaign” ne’ebé bele prejudika ema seluk.
Kandidatu ka Partidu Politíku sira barak, dalaruma hakarak konvense públiku ho forma oin-oin ho sira nia propaganda . Nune’e atu jornalista ida ba halo kobertura nia tenke kuidu uza ninia matenek hodi halo reportajen ida-ne’ebé kean atu publiku bele asesu notísia ka programa ne’ebé kontein ho informasaun lolos no kredivel tamba publikasaun notísia ne’ebé mída halo ne’e ba interese públiku, laós ba interese grupu polítiku ruma. Jornalista sira mós tenke luta hasoru presaun husi liur mai iha redasaun laran, nune’e sira bele tranzmite informasaun loloos ba sidadaun sira ne’ebé durante ne’e sai ona vitima ba polítika ukun-na’in sira ne’ebé laloos. Signifika, jornalista no mídia tenke kontinua tau an nu’udar asu mahein (watch Dog) hodi konkretiza ninia papél kontrolu sosiál. Entaun, jornalista tenke tau nia pozisaun nu’udar defensór ba direitu sidadaun nian, la’ós sai fali portavoz (corong) ba partidu sira hanesan individuu jornalista balu halo iha tinan anterior sira.
Referensia sira pasadu hatudu jornalista Timor oan natoon, depende de’it ba sentimentu haksolok husi partidu politíku ka indivíduu politíku sira nia propaganda no bainhira jornalista halo pergunta ou entaun jornalista sira ko’alia asuntu ne’ebé akontese dadaun hela, pur ezemplu lider partidu: Trata malu, no sadik malu “ fighter of leader”, ida ne’e sei la forma sosiedade ida ba estabilidade nomós bele kontribui direita ba konflitu komunál. Jornalista no mída nia obrigasaun étika mak tenke evita kobertura no publikasaun ne’ebé hamosu konflitu komunál iha sosiedade nia leet.
Relativamente públiku hein hela jornalista no kanál mídia sira servisu ne’bé afavor ba povu babain (voice of the voiceless). Jornalista no mídia iha obrigasaun étika atu trata partidu polítiku hotu-hotu ho justu no balánsu iha sira ninia kobertura no publikasaun, liuliu hanoin kona-bá emosionál politiku. Atu reziste presaun no dezempeñu iha nivel eleisaun, jornalista sira tenke obdese ba prinsípiu étika no regra morál. La iha regra sira-ne’ebé nia karater universál katak, sira hotu define jornalizmu nu’udar kontinuasaun buka lia-loos no objectividade faktuál. Tenke verifika no verifika (check and recheck) iha serbisu profisionál jornalizmu nian, hatudu respeitu no respeitu ba ema ka entidade seluk. Implisitamente, iha reasaun mak, sentimentu morál no responsabilidade no mós abilidade atu komprende ema nia hanoin, la haree ba sirkunstánsia sosio-politiku, jornalista nia responsabilidade prinsipál mak, podér “bens dahaat” la iha fatin nato’on atu fó benefísiu ba Governu,partidu polítiku ka ema ruma. Ema ne’ebé jornalista hatudu de’it laran-metin ba sidadaun,nia iha responsabilidade atu fó sai informasaun, sira halo sira-nia parte,kuandu la’o di’ak atu ko’alia nakloke liu.
Rai barak avansadu sira, Amérika sentrál, Áfrika Leste, no médiu Oriente & Áfrika Norte hamosu “tips” ka seguransa integradu ba jornalista sira bainhira halo kobertura iha situasaun kampaña eleitorál no kobre eleisaun sira mak hanesan; konxiénsia situasionál,asegura aplikasaun no mídia sosiál, kartaun imprensa no ropa, ekipamentu no dadus, husu no hatan ho kalma no solidariedade.
Felizmente, jornalista rai avansadu sira, presiza tebes matéria dadus, faktu no matéria seluk molok ba kobertura tanba hanoin katak, mídia hala’o papél integral iha realizasaun eleisaun ne’ebé livre no justu. Maibé kobertura eleisaun bele ezize tebes, subliña no perigozu ba pratikante mídia sira. Xave di’ak jornalizmu eleisaun mak prepara hela peskiza kona-bá kandidatu ka partidu politiku sira tenke halo molok hahú kampaña atu nune’e pergunta relevante sira bele husu tempu ne’ebé loos.
Pergunta ne’ebé loos mak reflete barak sidadaun sira nia sofrimentu ka situasaun. Kobertura tenke bazeia ba preokupasaun hirak nne’ebé tuir mai ema hasoru problema barak iha sira-nia moris loroloron nian. Liuhusi viajen sira, kandidatu tenke konfronta asuntu sira-ne’e no propoin solusaun ida mak angulu (Angle) jornalista nian. Ida-ne’e loos bainhira hala’o eleisaun iha rai ne’ebé politikamente frajil, importante atu prepara kobertura eleisaun nian konteúdu editoriál maibé importante mós atu hanoin kona-ba ninia organizasaun. Média hotu “Outlets” la haree ba sira-nia karateristika espesífiku, presiza halo planu ida kobertura propriu, karik ida-ne’e organiza oinsá atu uza rekursu importante sira bainhira rekursu limitadu, ka optimiza uza rekursu ne’ebé iha hodi publika prekupasaun sidadaun mukit sira nian iha kampaña eleitorál.
Referénsia:
- Ivo Mateus Goncalves, 2022 “ Matadalan Reportajen eleitorál” Conselho de Imprensa (CI-TL) Outubru 2022
- Crhistophe Delore, Hand Book For journalist during Election “ Reporter Without Borders” 2015 Edition
- https://www.comminit.com/content/handbook-journalists-during-elections
- https://www.tax.mpg.de/fileadmin/user_upload/Denter1.pdf
- https://tribratanews.kepri.polri.go.id/2020/10/20/pahami-apa-itu-kampanye-hitam-black-campaign/
