Ainaro Lian Orluli — komisaun funsaun públika (KFP), sosializa informasaun kona-ba prevensaun asedu seksual, ba funsionariu administrasaun munisípiu Ainaro.
Tersa (22/11/22), ba jornalista lian Orluli, Komisária Funsaun Públika, Maria de Jesus Sarmento afirma, bainhira funsionariu ne’ebé komete aktu asedu seksual iha servisu fatin, vitima tenke hatoo keixa, hodi submete ba prosesu investigasaun.
“ Ha’u hanoin sansaun funsaun públika ne’e iha, hahú kedas iha referensia eskrita, iha suspensaun no iha mós in-atividade no demisaun, entaun ba funsionario sira ne’ebé maka halo asaun sira ne’ebé bandu komforme ba iha gravidade pena, liga ho asaun ne’ebé maka sira halo,” dehan Maria de Jesus, komisária funsaun públika.
Reprezentante Administradór Munisípiu Ainaro, Ruivo Magno hateten, tuir lolos funsionariu hamutuk 80, mak partisipa iha formasaun refere, maibé kestaun klima, difikulta funsionariu sira husi Postu Hatobuilico,no Hato-udo, atu partisipa iha sensibilizasaun ne’e.
“ Tanba kondisaun klima difikulta funsionáriu lubuk ida maka la mai partisipa, no hau hakarak hatete deit buat ida asedu sexual ne’e foun ba ita funsionáriu sira hotu, no hau rasik hakarak rona direta bainhira ita hetan kazu sira hanesan ne’e sansaun saida maka bele hetan no fo mai ita, no iha formasaun ida ne’e husu partsipa masimu ba atu bele hatene asedu ne’e iha tipu saida deit no husu atu rona ho diak nune’e ita bele aplika iha ita nia servisu,” katak Ruivo Magno.
Komandante PNTL munisípiu Ainaro, superintendente Justino Menezes hateten, formasaun ne’e importante hodi prevene ba aktu asedu seksual, tanba ne’e husu ba kargu diretór sira atu hatudu ezemplu diak, hodi promove traballador sira.
“ Media sosiál ne’e sai izemplu ida ba ita tanba kargu sira hanesan dirétur dala ruma uza oportunidade hodi bosok nia funsionario atu promove kargu nune’e hodi heta benifisiu ba asedu sexual. Tanba ne’e liu husi formasaun Prevensaun asedu sexual ida ne’e hodi prevene di’ak liu tan,” dehan Justino Menezes.
Enkuantu, formasaun ne’e hala’o iha salaun enkontru administrasaun munisípiu Ainaro,durante loron ida no hetan apoiu husi organizasaun internasionál ILO.
Editor : Orluli news
