Lian Orluli — Komfrontu ne’ebe akontese iha suku Cassa Postu Administrativu Ainaro, loron 30 Junho kalan, rezulta uma 12 hetan estragus, inklui Jovem Alfredu Pires kanek grave tamba hetan sona iha àrea Luan kadoik.
Relasiona ho Komfrontu ne’e, iha loron tersa 11/07/2023, PNTL organiza dialogu ho Autoridade Munisipiu, KRAM, Conselho Veteranos, hamutuk ho komunidade suku Cassa, Autoridade Kultural, hodi solusiona problema ne’ebe akontese, tamba ne’e Lia-na’in husi suku Cassa reprezentante lisan bo’ot rua husi Bucar ho Bunel, maka sei solusiona Kulturamentel tuir tradisaun lisan ukun ho bandu suku Cassa nian.
Nemezio Lopes de Carvalho, Autoridade Kultural Suku Cassa
“Hau senti Kontenti ho esforsu kria dame no paz iha suku Cassa ne’e, problema ida ne’e akontese bebeik ona komesa husi Primeiru governo ate a data, ohin ne’e bele hetan ona solusaun, rejultadu di’ak tebes tamba parte hotu-hotu kopera ona loke ona laran ba malu hodi dame malu nune’e problema ida ne’e entrega ba Autoridade kultural suku Cassa mak sei rezolve tuir tradisaun kultura suku Cassa nian ”. Nemezio Lopes de Carvalho, Autoridade Kultural Suku Cassa, hatete.tersa (11/07/23)
Reprezentante Autoridade Kultural suku Cassa, Nemezio Lopes de Carvalho hatutan, sei halibur hamutuk ho lia-na’in suku Cassa hodi tu’ur diskute hamutuk nune’e bele solusiona problema ne’e to’o rohan.
Alemde ne’e reprezentante veteranos suku Cassa sr, José hatutan tan, problema ne’e tenki rezolve kulturamente husi Autoridade kultural sira nune’e bele solusiona diak liu tan, hodi hetan Dame no Páz.
sr, José eis Nurep suku Cassa.
“Problema ne’ebe akontese entre Jovem suku Cassa, antes ne’e Autoridade lokal sira hala’o dialogu bebeik ona to dala 4, maibe sedauk hetan solusaun ne’ebe maka di’ak, agradese tebes ho dialogu ne’ebe realiza loron ohin ba dala 5 hodi hetan solusaun ne’ebe diak tebes ba ita hotu, problema ne’e deside ona katak entrega ba Autoridade Kultural mak sei rezolve tuir tradisaun kultura suku ne’e nian, nune’e hahu ohin ba oin ita nia komunidade,jovem sira hotu-hotu bele hakmatek iha dame ho páz nia laran iha ida-idak nia fatin,sira bele hala’o atividade ho normal no diak liu tan ba oin, tamba ita hotu sempre hakarak moris ho Paz no Dame iha ita nia rain rasik,” hatutan sr, José eis Nurep suku Cassa.
Iha sorin seluk Autoridade seguransa Comandante Comando PNTL, Superentendente Paulino Carmo Pereira hatete, husi dialogu ne’e hetan duni solusaun iha dalan ba dame malu, husi problema ne’e iha mos indikasaun balun maka hatudu problema mai husi arte-marsiais.
“Problema ne’e iha indikasaun balu maka hatudu involve mos husi arte marsiais balun, tamba ne’e husi Sub KRAM Ainaro suspende atividade arte marsiais iha suku Cassa durante fulan ida”. Hateten Comandante Comando PNTL Munisipiu Ainaro Paulino Carmo iha intervista.
ho nun’e Sub KRAM munisipiu Ainaro, deklara liu husi akta hodi suspende atividade treinu iha rantin Cassa, durante Fulan Ida hahù iha loron 11 julho to’o 11 Agostu tinan 2023.
“Problema ne’ebé maka akontese iha suku Cassa indika mos grupu Arte marsiais, tamba ne’e parte PNTL kordena ona ho KRAM hodi kontrola no suspende atividade artemarsiais nian, durante fulan ida iha suku Cassa,” deklara Prezidente Sub KRAM Munisipiu Ainaro, Marcelino Mendonca.
Nune’e mos iha intervensaun husi Administrador Munsipiu Ainaro Leovegildo Amaral Pereira hateten, grupu Arte marsiais tenki kontribui ba pàz no estabilidade hodi garante seguransa iha suku Cassa
“Grupo arte-marsiais labele komete problema maibe kontribui kria pàz no dame tenki garante estabilidade suku ne’e nian Tamba ne’e hau husu ba PNTL atu kontrola Grupu arte marsiasiais sira ne’ebé maka sub KRAM suspende sira nia atividade,” Intervesaun ADM. Leovegildo iha ambitu Dialogu.
Emkuantu dialagu ne’e organiza husi Comando PNTL munisipiu Ainaro, partisipa Masimu Autoridade Munisipiu, Autoridade seguransa, Autoridade Protesaun Sivíl, Autoridade Kultural Suku Cassa, parte Religioju, inklui Komunidade no Jovem Suku Cassa.
Editor : Lian Orluli
