Lian Orluli,Mauchiga 16 Janeiru –Komunidade iha area Blors, Aldeia Mauchiga hatudu espíritu kooperasaun ho independentemente Voluntáriu ke’e rasik estrada ida ho naruk maizumenus metru atus lima. Atividade ne’e involve uma-kain sanulu ne’ebé hela iha area refere.
Voluntariu ne’e hatudu komunidade nia preokupasaun ba asesu transporte ne’ebé limitadu. Molok estrada ne’e loke, la’o susar, liu-liu iha tempu udan, nune’e susar atu asesu ba estrada Públiku, hodi transporta produtu agríkola, no kumpre nesesidade loro-loron nian.
Komunidade iha area Blors, hamutuk ho rezidente lokál sira, serbisu hamutuk hodi hamoos rai, halo rai sai nivel, no loke dalan foun ida ba viajen ne’ebé seguru no konfortavel liu. Serbisu hotu-hotu hala’o ho independente la-hó ekipamentu pezadu, depende ba komunidade sira nia forsa no kamaradajen.
Voluntáriu ida esplika katak inisiativa ida-ne’e mosu hosi akordu hamotuk ida ho rezidente sira, nune’e bele fasili dadaun komunidade sira bele asesu.
“Ami realiza dadaun ona, tanba hein husi governu halo asistensia sei lori tempu, tanba ne’e ami konkorda atu loke estrada ne’e independentemente ba bem komum,” João Tavares dehan.
Xefe Aldeia hato’o ninia apresiasaun ba inisiativa husi Voluntáriu Komunidade Blors no komunidade sira husi Área Mauchiga. Tuir aldeia, espíritu kooperasaun mútua ida-ne’e reflete valór forte sira hamutuk nian ne’ebé metin nafatin iha komunidade nia laran.
“Ida-ne’e maka ezemplu konkretu ida kona-ba partisipasaun komunidade nian iha dezenvolvimentu suku nian,” dehan xefe Aldeia Mauchiga.
Komunidade Blors nian sira hein katak konstrusaun estrada ida-ne’e sei hadi’a bem-estar hosi rezidente sira no enkoraja atensaun liután hosi parte oioin. Ba oin, komunidade iha planu atu kontinua hala’o atividade dezenvolvimentu sosiál no ambientál ba avansu Área Aldeia Mauchiga.
Ativiudade voluntariu ida-ne’e hanesan prova ida katak ho unidade no kooperasaun, komunidade bele lori mudansa loloos ba ambiente ne’ebé diak iha komunidade nia leet.
Notisia ne’e Kontribuisaun husi komunidade Blors Aldeia Mau-chiga
