Lian Orluli—Komunidade suku Kassa, postu administrativu Ainaro Vila, munisípiu Ainaro, entrega rai hectares ualu (8) ba Estadu hodi harii fatin lixu rejionál.
Xefe suku Cassa, Linguinhos de Araújo, hatete, rai ne’ebé mak entrega ba Estadu fiksu ona ho luan kuaze hectares ualu hodi harii lixu fatin rejionál nian iha munisípiu Ainaro.
“Rai ami oferese ba Estadu ho nia luan hectares ualu hodi harii fatin lixu, sai mós hanesan rejionál ba munisípiu tolu hanesan Same, Covalima munisípiu Ainaro rasik atu lixu ka fo’er ne’ebé mak iha sei lori ba soe hotu iha fatin ne’ebé agora daudaun konstrui ona iha area Betun, aldeia Bolta, Suku Kassa,” Xefe suku Cassa, Linguinhos de Araújo hateten ba jornalista Lian Orluli iha Ainaro, Segunda (08/05).
Iha fatin hanesan, Konsulta COI Internasionál Jestaun Lixu, Fernando da Costa Noronha, hatete nia parte husu ba Ministériu Ordenamentu Territóriu no Ministériu Administrasaun Estatál atu servisu hamutuk hodi asegura area ne’ebé mak atu estabelese fatin lixu rejionál.
“Fatin ida ne’e xefe do suku hatete hanesan fatin ideal hodi bele oferese ateru sai hanesan fatin rejionál ba fatin lixu ne’ebé mak sei lori husi
munisípiu Same, Suai no Ainaro rasik,” Konsulta COI Internasionál Jestaun Lixu, Fernando da Costa Noronha, nia hatutan.
Aleinde ne’e, Fasilitador PPIP-MOP, João Jerónimo, hatete, konstrutór ba halo sosializasaun ba setór rezinhos solidus ne’ebé mak estudu viabilidade aprova tiha ona ne’ebé agora hala’o preparasaun ba iha viabilidade.
“Enkontru ida ne’e Ministériu Planu no Ordenamentu servisu hamutuk ho Ministériu Administrasaun Estatál ho konstrutór mai halo sosializasaun ba setór rezinhos solidus ne’ebé mak estudu viabilidade aprova tiha ona ne’ebé mak agora hala’o preparasaun ba iha viabilidade,” nia haktuir.
Enkuantu, tuir observasaun Jornalista Orluli nian iha terenu nota katak, ekipa Planu Ordenamentu no konsultór identifika rai hodi harii lixu uza mós JPS no DROM.
Editor : Lian Orluli
