Lian Orluli– Komunidade husi Postu Administrativu Maubisse husu ba parte Nasional liu husi Autoridae Protesaun Civil estabelese tan Postu Korpu Bombeiru ida iha Postu Administrativu Maubisse hodi responde ba komunidade sira bainhira hasoru insendiu ka dezastre naturais.
Komunidade Manuel Sequeira hateten, durante ne’e laiha destakamentu Korpu Bombeiru iha Postu Administrativu Maubisse, susar kombate insendiu bainhira akontese, tamba ne’e rekomenda ba Guvernu presiza destaka postu permanente Korpu Bombeiru iha Postu Administrativu Maubisse nune’e salva komunidade bainhira akontese dezastre naturais.
“Maubisse Villa ne’e iha merkadu laran ne’e ahi han dala rua, ami husu atu Bombeiru bele hato’o ba iha Munisipiu, Nasional se bele karik tau netik pos Bombeiru balu iha ne’e para bele ajuda komunidade Maubisse tamba Maubisse ne’e komunidade barak, tamba ne’e ami husu ba Guvernu ho haraik-an laos ba ami nia an rasik maibe ba komunidade Maubisse ne’e akontesimentu hanesan ne’e bebeik ona sebele karik liuliu ba seguransa Bombeirus tau netik pos Bombeiru balu iha iha Postu Maubisse.” Hateten Komunidade Manuel Sequeira de Araujo.
Claudino Mendonca hatutan antes ne’e akontese insendiu rejulta idoju Jose Albertu Carlos lakon vida ho sasan uma laran ahi han total, Guvernu central presiza instala postu permanente Korpu Bombeiru iha Postu Administrativu Sira hodi atua lalais insendiu ne’ebe akontese.
“Ministeriu anterior atu insatala pos Bombeirus ida iha postu Administrativu Maubisse atu nunee akontese hanesan nee iha tempu oin mai bele atende imediata ba vitima sira neebe infrenta dezastre naturais.” Hatutan Reprezentante Administrator postu Maubisse Claudino Mendonca
Komandante Operasional Autoridade Protesaun Civil Ainaro Moises Mota esklarese, Komandante Operasional Autoridade Protesaun civil Munisipio Ainaro tau ona planu nosubmete ona ba Guvernu central hodi instala Postu permanente Korpu Bombeiru iha postu Maubisse.
“Ami iha ona planu karik Guvernu central iha posibilidade bele estabelese postu haat, tinan nee ita sei realiza iha postu Hatobuiliko, tinan oin ita hare tok planu oinsa ita bele tau iha Maubisse tamba Postu Maubisse nee area nebe luan, komunidade barak tebtebes, inklui postu Hato-Udo.” Moises Mota Komandante Operasional APC Ainaro.
Entertantu Munisipio Ainaro iha postu haat mak hanesan Postu Ainaro Villa kompostu husi suku hitu, Hato-Udo suku rua, Hatobuiliko suku tolu no postu Administrativu Maubisse suku sia.
Jornalista: Luciana Reis da Cruz
Editor : Lian Orluli
