Lian Orluli—Komunidade iha munisípiu Ainaro hadi’a daudauk ona estrada area Bolmeta nian liga ba iha munisípiu Covalima, tanba impaktu hosi udan boot ne’ebé mak akontese durante loron tolu hodi afeta ba estraga refere kotu total.
Rejidente Francisco Quintão da Costa, konta, akontese udan boot hodi halo estrada área Bolmeta kotu, iha loron Tersa semana ne’e, maizumenus iha oras meiudia nian.
Nia dehan, bainhira akontese udan boot iha postu administrativu Ainaro villa, provoka bee nalihun no ikus mai sobu estrada ne’ebé ateru ho rai henek no fatuk, kotu, tanba ne’e karreta no motorizada sira ne’ebé mak sirkula husi área Jakarta II Ainaro labale halo movimentasaun ba mai.
Nune’e, iha loron Kuartu feira semana ne’e, komunidade iha inisiativa rasik hodi ateru fali estrada refere, nune’e bele fó asesu fali ba sirkulasaun transporte publiku no privadu, maibé motorista ne’ebé kondús transporte públiku no privada hanoin selu komunidade sira nia kolen hodi hadi’a estrada aat ne’e.
“Nu’udár Komunidade iha suku Soro ho voluntáriumente hadi’a estrada kotu iha Bolbeta ne’e, no ami laiha intensaun atu halo kobransa ba pasajeiru sira bainhira liuhusi ne’e, maibé karik pasajeiru sira iha hanoin ruma hakarak fó osan 1 USD ka 2 USD entaun ami simu,” Francisco hateten ba jornalista Orluli iha Ainaro, Sesta (12/05).
Sidadaun ne’e mós husu ba Governu atu tau atensaun hodi hadi’a lalais estrada refere, tanba tuir estrada ne’e tenke harii ponte ida iha fatin ne’e rasik.
“Fatin ida ne’e presiza tau ponte, tanba iha laletek ne’e iha mós bee matan boot ida, bainhira iha tempu udan bee ne’e sulin maka’as tebes, husi parte tékniku sira mai survey iha fatin ne’e hanoin bee ne’ebé nalihun ne’e bee udan, maibé ne’e laloos,” nia hatutan.
Enkuantu, tuir observasaun jornalista Lian Orluli iha terrenu nota katak, husi akontesimentu estrada ne’ebé aat, parte Institutu Gestaun Ekipamentu (IGE) seidauk koloka ekipamentu pezadu ruma hodi hadi’a estrada refere.
Editor : Lian orluli
