Lian Orluli— Komunidade Polorema, aldeia Ainaro, suku Ainaro, munisípiu Ainaro, ho voluntariamente harii ponte tradisionál ida hodi fasilita estudante sira nia movimentasaun ba mai.
Rejidente Alarico Verdial hatete, iha tempu okupasaun Indonézia estrada husi Ainaro, karreta fatin liga direta ba iha área Polorema no iha ponte no estrada di’ak, maibé tanba laiha manutensaun entaun ponte ne’e monu no obriga komunidade sira tenke hakur mota ho korrente boot iha tempu udan.
Tanba ne’e, komunidade iha inisiativa rasik hodi konstrui ponte ne’e uza material tradisionál ai-Au hodi nahe iha fondasi ponte ne’ebé eziste hela, nune’e bele fasilita Estudante sira la’o ain iha ponte leten.
“Iha tempu Indonézia nian estrada ne’e liga to’o iha Sabagu ho Polorema ne’e, hodi difikulta komunidade barak atu ba merkadu no labarik sira mós barak bainhira atu ba eskola iha Vila ami liu la di’ak, tanba ai-Au sira dodook hotu ona, tanba ne’e ami iha inisiativu hodi harii fali ponte ne’e atu nune’e ami bele la’o di’ak,” nia hateten ba jornalista Orluli iha Ainaro, Sesta (12/05).
Iha fatin hanesan, estudante Nizia da Silva Magno, hatete nia parte husu ba Governu atu harii ponte ne’ebé modernu, nune’e bele fasilita estudante sira la’o ba mai, tanba estudante mak hanesan futuru nasaun nian.
“Ami estudante sira ne’ebé hela iha fatin Polorema ho Sabagu-lau husu ba Governu atu tau matan no hadi’a ponte ne’e ba modernu, atu nune’e ami bele liu ho di’ak, kuandu iha tempu udan ami liuhusi fatin ne’e ta’uk los, tanba la’o de’it iha ai-Au nia leten,” Nízia haktuir.
Enkuantu, totál populasaun iha Polorema hamutuk 200 ho família uma kain hamutuk 54, ne’ebé mak maioria moris ho vida agrikultura.
Editor : Lian Orluli
