Lian Orluli– Konstrusaun ponte Mauleo Suku Mau-Nuno Postu Administrativu Ainaro Villa, implementa husi kompanha Sales Luis ho durasaun kontratu fulan ualu, maibé fulan ne’en ona la iha funsionamentu.
Administrador Postu Administrativu Ainaro Villa, Jerry Manuel Magno, husu ba Kompanha, obras públika no tékniku sira, atu aselera servisu, nune’e bele fasilita komunidade atu lori produtu ba faan iha merkadu.
“Ami ejije ba kompanha, obras públiku no tékniku sira atu aselera servisu tamba ami lakoi projetu ne’e atu abandona, ami ejije tamba Komunidade nia ejijensia, tamba tinan naruk ona Suku Maunono la asesu ba ponte, tempu udan sira labele halo movimentu, ho ida ne’e mak tinan ne’e oportunidade ba Suku Mau-Nuno, maibé prosesu obra ne’e la la’o, iha neba kontratu fulan ualu signifika obra nia implementasaun ne’e anual, laos multi anual.” Dehan Administradór postu Ainaro
Iha fatin hanesan Enjeneri kompanha Sales Luis unipesoal LDA, Mario Bianco klarifika, kompanha seidauk bele konstrui ponte Mauleo tamba sei hein rejultadu amostra material hanesan rai henek, tamba sei lori ba laboratorium Ministerio Obras Públika.
“Projetu Konstrusaun ne’e tarde problema ne’e iha material hanesan rai henek, tamba iha laboratorium too agora nia rejultadu seidauk fó sai, tamba ne’e mak agora ami ke dadauk too hetan rai henek barak ona mak uja hodi servisu dadauk hodi hein prosesu teste laboratorium.“
Entertantu kontratu Projetu ne’e dura ba fulan ualu ho valor Orsamenteu hamutuk USD$ 452,957.49.
Jornalista:Luçiana Reis da Cruz.
Editor: Clementina Fatima
