Lian Orluli – Ministru Obras Públiku Samuel Marcal hateten projetu hamutuk 62 entre numeru ne’e balun sei halo verifikasaun inklui estudu tékniku, sei asina kontratu bainhira hetan aprovasaun husi Konsellu Ministru, tanba ne’e sei asina deit kontratu ba projetu hirak ne’ebe verifika no iha orsamentu ba ezekusaun projetu
“Estrada Mau-ulo liga Bobonaro tama hotu iha prosesu ida deit tékniku sira prepara hela kontratu ba Mau-ulo nian no ba fatin sira seluk pakote hamutuk 21 ita sei asina kontratu iha tempu badak no projetu 41 tékniku ADN sei halo verifikasaun foun fali, tanba antes ne’e la halo verifikasaun, verifikasaun final sei lori ba iha konsellu Ministru aprova hafoin tékniku prepara hodi asina kontratu “, Ministru Obras Públiku Samuel Marcal hateten iha Turiscai hafoin intervista kinta ne’e (13/06/2024).
Governante ne’e esplika, dau-daun ne’e temporariamente loke deit estrada, kona ba ponte Ainaro Cassa presija halo estudu ne’ebe klean hodi bele prepara dezeñu tékniku ba implementasaun projetu tanba submisaun proposta ba nasional emerjensia
“Projetu emerjénsia ponte Cassa nian presija halo estudu viabilidade hodi prepara dezeñu, se hotu tinan ne’e entaun ita bele implementa iha tinan ida ne’e maibe agora ita loke deit estrada temporariu nune’e bele hadia fila fali ponte ne’e“, nia esplika.
Tanba ne’e nia husu Komunidade atu pasiénsia no kolabora nune’e ezekusaun orsamentu estadu ho justu ba implementasaun Projetu sira bele iha kualidade uza ba tempu naruk
“Ita sei hare didiak karik ba Komunidade husu sira atu pasiensia tanba ita nia estadu laos estadu ida riku liu, ita hotu tenki kolabora, nune’e ita labele gasta ita nia osan arbiru deit, ne’e osan povu nian, ita gasta ho kuidadu, hodi hetan buat ne’ebe mak ho kualidade nune’e ita uza ba tempu ne’ebe naruk”, governante ne’e hakotu ba Lian Orluli kinta ne’e iha Turiskai Manufahi.
Husi Projetu 62, pakote 21 sei asina kontratu ho kompañia manan nain projetu hodi tama ba faze implementasaun no pakote 41 hein ba faze tuir mai tanba ADN sei halo verikasaun
jornalista: Sarah
Editor : Lian Orluli
