Lian Orluli—Liu husi reuñiaun no Aldeia no Suku Autoridade sira alerta bebeik ona komunidade atu labele okupa estrada ninin, hanesan fatin ba negosiu fa’an produtu tanba risku ba vida maibe, tanba deit atu sustenta moris ba loron naruk nian obriga komunidade sira tenki okupa estrada ninin, halibur produtu ba fa’an hodi hetan osan hola aihan ba auguenta moris.
Manuela Mendonça no Rosa Fátima negosiante ne’ebe buka moris liu husi halibur produtu iha estrada ninin merkadu ituto hateten maske estrada ninin fó risku ba ema nia vida maibe tanba de’it hetan rendimentu diak, obrigadu tenki okupa fatin refere tanba la iha ona fatin seluk ba sira
“Fátin ba ami atu fán sasan la iha, tanba ne’e ami tenki fa’an ami nia produto lokal iha de’it estrada ninin, tanba sosa nain sira bele sosa lalais maske fatin ne’e risku mai ami negosiante’’. hateten negosiante sira iha Aituto-Rina suco Mulo, Posto Administrativo Hato-Builico, Munisípiu Ainaro
Tanba ne’e Justino de Orleans Maia Lopes, negosiante dalan ninin Aituto-Rina husu Governu atu tau merkadu Aituto iha fatin ne’ebé seguru tanba besik estrada ninin fo risku ba vida
” Husu ba Governu atu tau merkadu Mulo iha fatin ne’ebé mak seguru, atu nune’e labele fó risku ba Negosiante no mos kompradores sira nia Vida”. negosiante Justino de Orleans Maia Lopes husu
Alende ne’e tuir Xefe Aldeia Mulo Paulino de Jesus klarifika, antes ne’e autoridade sira bolu atensaun bebeik ba negosiante merkadu dalan protokolo Aituto-Rina maibé komunidade sira kontinua no la iha konsiensia, hodi kuntinua fa’an produtu iha estrada protokolu refere.
“Negosiante sira ne’ebé mak fá’an sira nia produtu iha estrada ninin ne’e husi Administrádor fó ona karta xamada atu se’es husi fatin ne’e , tanbá fatin ne’ebé mak atu konstrui merkadu ne’e komunidade sira la fó gratuita, ami hala’o ona enkontru ba dala-3, maibe seidauk hetan solusaun tanbá ne’e mak komunidade sira lakoi atu ba fáan sira nia produtu iha uma ne’ebé mak konstrui ona, sai hanesan merkadu, maibe informasaun kada loron sexta sempre fó sai ba komunidade sira, atu nune’e labele fán produto iha estrada protokolu nian, maibé Komunidade sira la iha Konsiensia nafatin fán iha estrada ninin’’.Xefe Aldeia Mulo Paulino klarifika
Maske nune’e maibe komunidade Suku Mulo kontinu Fa’an de’it sira nia produto iha estrada protokolu Suku Aituto Posto Administrativo Hato-Builico, Munisípio Ainaro tanba la iha fatin seluk ba negosiante sira atu halibur produtu ba faán
Jornalista : Norvia/Sarah
Editor : Lian Orluli
