Lian Orluli 05/03/2026– Ministru Asuntu Kombatente Libertasaun Nasional (sigla portugés MACLN) Gil da Costa “Oan Soru” hateten maske iha proble oi-oin maibe neneik no beibeik sei husik hela lembransa ruma hanesan eransa ba jerasaun sira , nune’e nia nia haktuir inportante tebes kuda ezemplu diak ba jerasaun sira liliu hotu-hotu nia kontribuisaun ba estabilidade
“Tenki sai ezemplu diak ba ita hotu aprende, ita tenki agradese ba estabilidade ne’ebe sidadaun ida-idak asegura iha ninia laran, ne’e inportante no hau hatene katak agradesementu ida ne’e tenki agradese mos iha ne’e tanba ita bo’ot sira mai husi dalan ne’ebe hanesan no bes-besik malu, ita bele dehan hotu-hotu nia kontribuisaun ba estabilidade ne’e inportante tebe-tebes”, “Oan Soru” dehan iha abertura ba konferensia ne’ebe Centru Nasiona Chega reliza iha Komarka antinga Balide Dili, 05/03/2026
Nune’e “Oan Soru” mos enkoraja entidade sira servisu hamutuk hodi kontribui hanoin atu bele reforsa no fo solusaun ba problema sira hodi hadiak liu tan esbosu polítika reparasaun no esbosu lei reparasaun ne’ebe iha ona
“Mai ita hotu fo solusaun ho kakutak malirin, neneik beibeik bele husik hela eransa ruma diak tanba ita nia oan sira agora daudauk ne’e, sira-nia inan aman halo historia mais sira nia oan kiak ba historia, ne’e problema bo’ot , kuandu nain rasik halo historia depois lahatene konta historia ne’e hanesan dezastre ida, hanesan Ai ida karik nia tahan mak buras nia fuan mak tebar mais ninia abut la kaer rai metan ne’e problema bo’ot , ne’ebe mai ita hamutuk hodi fo solusaun fo forsa ba ita nia polítika ne’ebe ita prepara, legalidade ka lei ne’ebe ita prepara atu bele fo solusaun ba ita nia problema liliu iha area ida istoria luta libertasaun nasional ninian”, Governante ne’e hakotu nia diskursu abertura iha okaziaun ne’e
Konferensia nasional ne’ebe CNC organiza atu konsulta publiku nia hanoin nune’e bele hadia esbosu polítika reparasaun no esbosu lei reparasaun hodi dignifika vítima Konflitu polítika 1974-1999 no ida ne’e mos hanesan planu estratejiku ba tinan ha’at mai husi 2025-2030
Jornalista : Alves Carvalho
Editor: Clementina Fátima
