Lian Orluli, Hato-Builico, — Governu Munisípiu Ainaro hala’o Diálogu kona-ba Planu Integradu Dezenvolvimentu Munisípiu (PDIM) ba períodu 2025–2030 iha Postu Administrativu Hato-Builico.
Sorumutu ne’e fornese forum ida ba komunidade atu hato’o ideia, aspirasaun, no proposta prioridade dezenvolvimentu ba tinan lima oin mai. Diálogu ne’e envolve grupu komunidade oioin, figura lokál sira, no reprezentante institusionál sira. Ajenda diskusaun kobre setór xave sira hanesan infraestrutura, asuntu sosiál, instituisaun, eletrisidade, bee-moos, edukasaun, saúde, ekonomia sektorál, juventude, formasaun profisionál, turizmu , no agrikultura
PAM Manuela Georguina Carmo Bucar Corte-Real, Objetivu prinsipál hosi diálogu ne’e mak atu esplora ideia públiku sira hodi forma baze hodi estabelese planu prioidade dezenvolvimentu ida ne’ebé ekilibradu, transparente, no sustentável.
” Proposta sira husi partisipantes Hato-Builico sei sai hanesan referensia ba formulasaun planu evolusaun dezenvolvimentu munisípiu Ainaro nian” Dehan Lideransa Masimu ne’e
Kordenador CNJTL Postu Hato-Buliko, Elias Xavier, husu governo lokal atu introduz programa merenda escolar tenki sosa povu nia produto no kria grupo koperativa nuné bele hatan ba merenda escolar,nune’e mos minesterio Solidariedade Sosial no inkluzaun sigla (MSSI) Instituto Nasional seguransa alimentar sigla (INSS) atu bele halo levantamento ba baze dadus, ema vulnarel sira nune’e sira bele hetan sira nia direito báziku nudar ema vulnarel .
” Governo lokal atu introduz programa merenda escolar tenki sosa povu nia produto no kria grupo koperativa nuné bele hatan ba merenda escolar. Nune’e mos husu atu parte minesterio Solidariedade Sosial no inkluzaun sigla (MSSI) Instituto Nasional seguransa alimentar sigla (INSS) atu bele halo levantamento ba baze dadus ema vulnarel sira nune’e sira bele hetan sira nia direito báziku nudar ema vulnarel,la’ós solusaun mak fahe fos no mina maibé tenki hakonu sira nia direito ba hela fatin no direito ba subsidio sira ne’ebé estado atribui. Seluk rekomenda ba SAS Munisipio Ainaro atu halo levantamento ba dadus ba sistena be mos ne’ebé lao hela durante tinan naruk maibe equipamento balun at ona presija urijenti no prioriedade intevensaun emediatu hodi halo reparasaun no manutensaun kanu be no roska kanu nebé at nune’e bele fornese be mos ba ita nia komunidade sira ne’ebé presija be mós planu ne’ebé apresenta”. Dehan Kordenador Joventude Ne’e
Aleinde ne’e Profesór Eskola TECVOC Boetua atu governo lokal atu tau prioriedade ba seitor Edukasaun
“ Dadaun ne’e sira hari hela escola TECVOC no hari uma ho sala de aula ba estudantes sira,sira ne’e hotu la’ós osan husi governo maibé inan aman sira ne’ebé nia oan escola iha fatin refere mak kontribui fundo oituan hodi hari sira mos submete ona pedido ba PAM atu bele apoiu material no fundos balun ba konstrusaun escolar” Dehan Julio Magno
Iha Okajiaun ne’e resposta husi PAM katak sei fo kontribuisaun tuir kapasidade ne’ebé Administrasaun iha tuir kbi’it nudar pesoal ida- idak nian
Durante diskusaun, públiku fornese input krítiku, partikularmente kona-ba setór vital sira ne’ebé maka presiza tebes, hanesan saúde, edukasaun, bee-moos, no infraestrutura báziku. Partisipante sira subliña katak asesu ba servisu saúde no edukasaun adekuadu, disponibilidade bee-moos, no konstrusaun estrada no fasilidade públiku sira tenke sai prioridade prinsipál governu nian.
Ho partisipasaun komunidade ne’ebé ativu, governu munisípiu Ainaro hein katak planu dezenvolvimentu 2025–2030 sei hatán ba nesesidade reál rezidente sira-nian, enkuantu simultaneamente enkoraja kreximentu ekonómiku lokál no hadi’a bem-estar komunidade Hato-Builico no Munisípiu Ainaro tomak.
Jornalista : Lucya/Delia/Elias
Editor: Clementina Fatima
