Lian Orluli – Padre Mariano, Natál ne’ebé signifikativu kona-ba gratidaun, domin, no moris iha selebrasaun Natál nian. Nia subliña katak moris maka prezente gratuitu ida hosi Maromak ne’ebé tenke apresia no moris ho dame ho ema seluk.
Iha nia selebrasaun missa, Padre Mariano haktuir katak buat hotu ne’ebé Maromak fó ba ema nu’udar prezente gratuita. Tanba ne’e, ema sira hetan oportunidade atu moris iha gratidaun no fahe laran-di’ak ba ema seluk.
“Moris ne’e gratuita. Saida maka Maromak fó, ita simu ho gratuita. Tanba ne’e, ita mós tenki hatene agradese. Natal maka moris, no moris maka Natal”, nia hatete.
Nia subliña katak gratidaun tenke hatudu uluk iha família laran, liu-liu ba inan-aman sira. Tuir nia, aman no inan mak fundasaun primária ba ema ida-idak nia moris.
“Ita presiza agradese ba ita-nia família sira, liuliu ita-nia aman no inan sira, tanba sira mak ita-nia mundu. Família mak naroman lalehan nian ba mundu,” Padre Mario dehan.
Aleinde ne’e, Padre Mariano konvida sarani atu reflete kona-ba leitura sira Eskritura nian ne’ebé fó énfaze ba signifikadu naroman nian iha selebrasaun Natál nian.
Natal, maka Emanuel nia enkarnasaun, Maromak ne’ebé mai atu hela iha umanidade nia leet.
“Leitura ne’ebé rona iha kalan ne’e konvida ami hodi reflete kona-ba nesesidade ba naroman. Natal signifika Emanuel, katak Maromak mai hela ho ita no prezente iha ami nia leet”, nia esplika.
Padre Mariano hato’o mensajen Natál tinan ida ne’e nian, ne’ebé foka liu ba domin, moris, no ksolok. Nia konvida ema hotu atu moris hamutuk ho dame no hadomi malu.
“Mensajen Natál tinan ne’e nian maka domin, moris, no ksolok. Ita presiza moris hamutuk no moris iha dame nia laran,” nia hakotu.
Nia hein katak mensajen ida-ne’e sei sai hanesan lembransa ida ba kongregasaun atu halo Natál la’ós de’it selebrasaun anuál ida, maibé dalan moris nian ida ne’ebé nakonu ho gratidaun, domin, no dame loron-loron.
Jornalista: Fanesia/ Omi
Editor : Clementina Fátima
