Lian Orluli-– 4 Jullu 2025 – Programa Nasionál Dezenvolvimentu Suku (PNDS) Munisípiu Ainaro hala’o atividade monitorizasaun kona-ba implementasaun programa PNDS 2025 iha área Mauchiga Postu Administrativu Hato-Builiko, kontrola serbisu hodi garante kualidade serbisu iha baze.
Atividade ne’e involve ekipa husi PNDS, hamutuk ho ofisiál aldeia lokál no ekipa tekniku Postu.
Monitorizasaun ne’e foka ba projetu regulár PNDS 2025 ne’ebé lokaliza iha Aldeia Goulora. Projetu sira ne’ebé remata ona inklui konstrusaun estrada rua no kanál bee nian ho metru 50, no mós estrada Rabat-Betong ho metru 200.
Xefe Ekipa PNDS Postu Hato-Buliko Fransisco Xavier, haktuir, monitorizasaun ne’e ho objetivu atu garante projetu ida-idak la’o tuir planu no bele rona direitamente komunidade nia aspirasaun iha terrenu.
“Ami hakarak garante katak programa sira ne’ebé maka hala’o daudaun fó benefísiu loloos ba komunidade aldeia nian, tantu iha termu sira infraestrutura nian no mós empoderamentu nian”, nia hatete.
Xefe suku Mauchiga Abraon De Araújo hatutan, Programa PNDS nian ba tinan 2025, ajuda komunidade sira bele asesu ho transporte públiku ba iha merkadu no Sentru Saúde.
“Estrada ida agora dadaun PNDS hala’o iha tinan 2025 ne’e di’ak no fó benefisu tebes ba komunidade sira, aleinde ne’e mós opera serbisu diak ho Kompañia fornesedor hatama material la tarde no lalais. iha problema maka badaen sira gora tempu preokupa ho ku kafé, tanba ne’e, balu sei ba ku tia kafé, maibé balun maka ba hala’o serbisu, maibé balun bá nafatin serbisu ne’e kontinuasaun. PNDS nia programa la’o kapás tuir nia estandar IP, nia maka kontrola full iha lokasi ne’ebá ,nia kualidade tuir matadalan PNDS ne’e nian”. Lideransa komunitariu ne’e dehan
Monitorizasaun ne’e mós halo parte iha esforsu atu hametin transparénsia no akuntabilidade iha implementasaun programa governu nian iha nivel aldeia. Governu lokal Ainaro afirma nia kompromisu atu kontinua apoia dezenvolvimentu ekuitavel no sustentável iha rejiaun tomak, inklui área remota sira hanesan.
Jornalista: Pedrolina
Editor: Clementina Fatima
