Lian Orluli, Mane-Lobas 23 janeiru— Postu Saúde Mane-Lobas Maubisse inagura Ofisialmente husi Autoridade Munisipiu Ainaro, konsidera benefisiu tebes tanba sei atende komunidade la’ós de’it abitante 1.674 husi Aldeia Mane-Lobas maibé mós abitante husi suku viziñu sira.
Aldeia sira ne’ebé hale’u, hanesan Mane-Tu, Borulu, Daulelo, Rusulau, no Turiskain, hein atu utiliza servisu saúde ida-ne’e tanba nia lokalizasaun ne’ebé besik liu no asesivel liu, liu-liu ba rezidente sira ne’ebé uluk esperiénsia asesu limitadu ba servisu saúde sira.
Xefe Suku Mane-lobas Julião Pereira Tilman hato’o agradesimentu ba Autoridade Munisipiu ne’ebé atensaun no kompromisu hodi fó prioridade ba setór saúde. Nia subliña, konstrusaun Postu Saúde Mane-Lobas ne’e rezultadu husi kooperasaun di’ak entre governu lokal no komunidade.
“Ami agradese tebes no agradese ba governu sentrál ne’ebé fó prioridade ba saúde. Ho postu saúde ne’e, ita-nia komunidade agora asesu fásil liu ba servisu saúde ne’ebé adekuadu”, hatete Julião Pereira Tilman, Sefe Suku Man-Lobas
Komunidade Mane-Lobas Senti orgullu ho kontenti ho tinan barak Suku Mane-Lobas seidauk iha postu Saude, “Postu saúde ne’ebe Mak hamosu oan iha suku Mane-lobas ami agradese tebes ba estadu ida ne’e katak estadu marka historia foun ba suku mane-Lobas”.hateten: Eduardo Mendonça.
Hatutuan husi komunidade Mariana José Mendonça “Kontenti no Orgullu Agradese ba Autoridade Munisipiu tanba iha ona Postu Saúde ne’ebe mak besik ona iha ita nia le’et hodi hamenus risku mortalidade iha ita Nia komunidade Sira.”
Postu Saúde Mane-Lobas hetan inaugurasaun ofisiál husi Prezidente Autoridade Munisipiu Ainaro ho nia estrutura no Diretor Servisu Saude Munisipiu Ainaro. Serimónia inagurasaun ne’e partisipa mós husi Administradór Postu Ainaro, Administradór Postu Maubisse, Diretór SMS Ainaro no esrtruktura, pesoál seguransa PNTL, no komunidade Suku Mane-Lobas.
Komunidade hein katak postu saude ida ne’e funsiona ho optimal no sustentavel, nune’e bele hadia saude no bem estar rezidente sira iha Mane-Lobas no area ne’ebe haleu.
Jornalista : Lucia/Elfiana
Editor : Clementina Fatima
