Lian Orluli, Mane-Lobas 23 Janeiru— Prezidente Autoridade Munisípiu Ainaro, Manuela Georgina Carmo Bucar Corte-Real, ofisialmente inaugura Postu Saúde Mane-Lobas, parte husi projetu governu nian ba tinan fiskál 2025 nian. Konstrusaun ba postu saude ne’e hahu iha fulan Jullu no remata iha fulan Dezembru 2025 prosesu konstruk durasaun fulan lima.
Postu saúde ne’e harii atu hatán ba nesesidade atu kuidadu saúde husi komunidade Suku Mane-Lobas, ne’ebé istórikamente hasoru dezafiu relasiona ho distánsia no asesu ba fasilidade saúde. Ho funsionamentu postu saúde ne’e, oras ne’e komunidade bele asesu servisu saúde báziku ho lalais liu.
Prezidente Autoridade Munisípiu Ainaro haktuir katak konstrusaun Postu Saúde Mane-Lobas aliña ho planu governu nian, ne’ebé ezije suku ida-idak tenke iha postu saúde ida hanesan parte ida husi esforsu atu hadi’a servisu saúde públika.
Nia mós haktuir katak Suku Mane-Lobas iha ona graduadu saúde na’in ida, nune’e mós pesoál saúde sira hanesan pesoál saúde komunitária no parteira sira ne’ebé prontu ona atu hahú fó atendimentu. Ida-ne’e krusiál tanba ema sira halo viajen dook ba sentru saúde sira.
Governu Munisípiu Ainaro mós trasa planu sira seluk iha OJE 2025, ne’ebé sei inaugura Sentru Saúde ida iha Maulau iha fulan rua to’o tolu oin mai, hein katak sei serve suku lima iha rejiaun ne’e.
Prezidente Autoridade Munisípiu Ainaro husu ba Diretór Saúde atu hetan kedas ekipamentu médiku no ai-moruk ne’ebé nesesáriu atu nune’e pesoál saúde sira bele fó atendimentu ne’ebé profisionál no ba komunidade iha Postu Saúde Mane-Lobas.
Iha nia mensajen ba komunidade, Prezidente Autoridade Munisípiu Ainaro husu ba Mane-Lobas hotu-hotu atu utiliza no halo manutensaun didi’ak ba Postu Saúde ne’e. Nia espesifikamente husu ba komunidade atu labele husik animal tama ka estraga fasilidade postu saude sira, tanba edifisiu ne’e propriedade komunal no destina ba komunidade tomak nia diak.
“Postu saúde ne’e ba ita hotu. Mai ita hamutuk proteje, kuidadu didi’ak, no uza hodi hadi’a saúde komunidade Mane-Lobas nian,” dehan PAM
Komunidade Mane-Lobas simu ho laran ksolok inaugurasaun postu saude ida ne’e no hein katak servisu saude kontinua funsiona hodi hadia kualidade moris no bem estar rezidente sira nian.
“ Ami Kontenti tebes ho postu saude ne’e, tanba besik, ami baihira ai moras la presija on aba tramnetu iha ospital refral maubisse” dehan Moijes nudar Komunidade husi Suku Mane-lobas.
Entertantu Orsamnetu ba konstruksaun Postu saude ho total,1.803,75 ho medida 15.70 x 12.50 no kuartu 5 sala 2 inklui ho sala Maternidade no Haris Fatin 5, kostrusaun postu saúde nee konstrui husi kompania Leldu Unip.Lda
Jornalista: Fanesia
Editor : Clementina Fatima
