Ainaro Lian Orluli-19-09-2022- Sança da Costa hela iha Suku Mau-ulu Postu Administrativu Ainaru Vila, iha oan nain Lima, moris vida Agrikultura kuda ai-han Produtu lokàl inklui Hortikultura hodi selu oan sira ba Eskola iha Universidade.
Sança ho nia kaben iha oan nain Lima moris vida agrikultor ka’er to’os ne’ebe ho distansia Kilometru rua husi Mau-ulu to’o Tamhuk Ainaru, Hakarak de’it selu oan ba eskola iha Universidade, maske ho distansia ne’ebe do’ok husi hela fatin la sente kolen no la sente baruk tan interese hakarak suporta oan sira nia mehi to’o Sucessu.
Ba jornalista Orluli Sança haktuir maske to’os do’ok la sai bareira ba Sança ho nia kaben no la sente kolen tamba sempre hetan tulun husi oan sira suporta lori modo ba fa’an iha Merkadu.
“Tinan barak ona ami halo to’os iha ne’e, rai agora ami halo to’os ne’e laos ami nian maibe Eransa ema nian,nain fo fiar ba ami hodi halo to’os, liu husi ne’e mak agora dadaun kuda hela Produtu sira, kuando iha tempu bailoron hanesan ne’e ami kuda modo hodi fa’an no iha tempu udan ami kuda fali batar,koto,ai-farina fehuk no mos seluk tan, ne’ebe mak bele hetan lalais osan bainhira fa’an iha merkado, Modo agora ami kuda sosa nain sira mai to’o iha ne’e, no balun ha’u tutur de’it iha ulun lori ba fa’an iha merkadu, no labarik sira fila husi eskola sira sempre mai ajuda ami nain rua kuda-modo no bainhira lori ba fa’an sira mos ajuda ha’u tutur modo lori ba fa’an hodi hetan netik osan nune’e bele responde nesesidade uma laran no moos liliu ba oan sira nia Estudu”. Haktuir Sança iha nia to’os
Alemde ne’e nia hatutan husi modo ne’ebe sira fan loron ida hetan Dolar $5-10 maske nune’e ho rendimentu ne’ebe mak ki’ik, bele responde nesesidade uma laran no oan sira nian.
Sança ho idade 45 ho nia kaben ho idade 47 iha oan nain Lima, oan primeiru agora dadaun hala’o estudu iha Universidade Nasional Timor Lorosa’e no seluk agora dadaun sei estudu iha eskola Sekundària no Ensinu Bàziku.
Editor : Lian Orluli
