Lian Orluli—Tribunal Distritál Suai (TDS) aplika ona medida koasaun prizaun preventiva ba arguidu ho naran inisiál SR, tanba komete kazu omisídiu iha suku Nunumoge, postu administrativu Hatobulico, munisípiu Ainaro.
Komandu Investigasaun Kriminál Munisípiu Ainaro, sarjentu xefe polisia Armindo do Rosario Araújo, hatete, hafoin SR kumpre oras 72 iha sala detensaun komandu PNTL munisípiu Ainaro transporta kedas ba Tribunal Distritál Suai (TDS) hodi tuir primeiru interrogatóriu.
Komandu Investigasaun Kriminál Munisípiu Ainaro, sarjentu xefe polisia Armindo do Rosario Araújo
Nune’e, Tribunal Distritál Suai aplika ona medida koasaun prizaun preventiva ba arguidu ho inisiál SR, tanba provadu, komete krime armas brankas, hodi rezulta Maubuti ho nia kaben Ana Orleans no bei-oan Celestino Xavier, lakon vida no Luciano labarik inosente sofre kanek grave iha kakorok no daudaun ne’e hala’o hela tratamentu iha Hospital Nasionál Guido Valadares (HNGV).
Enkuantu, kazu omisídiu ne’ebé akontese iha suku Nunumoge, postu administrativu Hatobulico, munisípiu Ainaro, ne’ebé suspeitu ho inisiál SR, oho vítima mahein lisan Berdato Maubuti ho nia kaben Ana Orleans no mós bei-oan Celestino iha loron 17 fulan Abríl 2023
Kazu omisídiu ne’e akontese iha aldeia Nunumoge-lau, suku Nunumoge, postu administrativu Hatobuilico, munisípiu Ainaro, iha loron Segunda (17/04) maizumenus tuku 04:00 Oras Timor-Leste (OTL) madrogada.
Hafoin akontesimentu, parte PNTL munisípiu Ainaro to’o kedan iha fatin akontesimentu hodi halo identifikasaun iha fatin akontesimentu no foti mate isin husi uma laran ne’ebé hetan apoiu husi Autoridade Protesaun Sivíl munisípiu Ainaro nian.
Sidadaun ne’ebé lakon vida Maubuti ho idade 60, Ana Orleans idade 60, mate iha uma lisa Berdato, inklui Celestino Xavier idade 19, hafoin evakua ba iha sentru saúde Ainaro, maibé labele salva vida no vítima Lúcio de Araújo tinan tolu, kanek todan iha kakorok, evakua ba iha sentru saúde Ainaro hodi kontinua transporta ba iha Hospital Nasionál Guido Valadares.
Mário Corte-Real nu’udar oan mane haktuir, kazu ne’e akontese maizumenus tuku 04:00 OTL madrugada, bainhira suspeitu SR tama uma laran no loke odamatan, vítima sira iha uma laran la sente, entaun hakfodak mai suspeitu kaer ona katana iha liman hodi taa vítima na’in-haat ne’e.
Tanba ne’e, Mário husu ba parte autoridade judisiáriu atu foti desizaun ida ne’ebé mak justu ba suspeitu ne’e hodi kumpre prizaun.
Iha fatin hanesan, komandante investigasaun PNTL Ainaro, sarjentu xefe Armindo do Rosário de Araújo, hatete, suspeitu iha ona sela detensaun durante oras 72, hodi submete ba primeiru interrogatóriu iha Tribunal Distritál Suai.
Enkuantu, iha terenu polisia rekolla ona evidénsia hanesan katana ne’ebé suspeitu uza hodi oho sidadaun na’in-tolu no hakanek labarik ida hodi asegura nu’udar evidénsia.
Entretantu, tuir lei númeru 05/2017 kona-ba arma branka, ne’e bandu ema kaer sasán kro’at hodi habadak ema seluk nia vida.
Editor : Lian Orluli
