Lian Orluli – 26 Fevereiru 2026 Hato-Udu –TIMOR GAP, hala’o divulgasaun progresu identifikasaun ba auto estrda iha Hato-Udu hodi ko’alia kona-ba progresu projetu Auto-estrada Zumalai ba Natarbora.
Eventu ne’e ho objetivu atu atualizasaun ba públiku kona-ba progresu iha identifikasaun rota estrada ne’ebé planeadu liga Zumalai ba Natarbora. Projetu ne’e konsidera hanesan estratéjiku hodi apoia konetividade interrejionál.
Divulgasaun ne’e hetan partisipasaun husi Ministriu Petróleu no Rekursu Minerais no Ministru Investimentu Estratéjiku, Sua Exelénsia Monteiro, Prezidente Autoridade Munisípiu Ainaro, Xefe Suku Hato-Udu, no komunidade lokál.
Iha diskursu Prezidente Autoridade Munisipiu Ainaro Manuela Georgina Carmo Bucar subliña importánsia husi apoiu komunidade ba projetu dezenvolvimentu ne’ebé sei implementa husi governu iha kolaborasaun ho TIMOR GAP.
“Ha’u husu ba Ainaro-oan sira atu labele impede projetu sira ne’ebé sei mai. Tanba ne’e, ha’u lakohi rona Ainaro-oan ruma impede projetu ne’e,” nia subliña ba partisipante sosializasaun ne’e.
Entretantu, reprezentante ida husi TIMOR GAP esplika katak faze identifikasaun ne’ebé la’o hela nu’udar parte inisia ba prosesu planeamentu projetu, inklui halibur dadus tékniku, kondisaun jeográfika, no impaktu sosiál potensiál sira.
Liu husi atividade divulgasaun ida-ne’e, hein katak komunidade Hato-Udu no área sira ne’ebé hale’u sei komprende objetivu no benefísiu sira hosi projetu ida-ne’e no partisipa ativu hodi fó apoiu ba implementasaun faze tuir mai ne’ebé la’o ho di’ak.
Governu hein katak projetu Auto-estrada Zumalai-Natarbora ikus mai bele fornese asesu transporte ne’ebé di’ak liu, fasilita distribuisaun ekipamnetu no servisu, inklui hadi’a bem-estar komunidade nian iha área sira ne’ebé dezenvolvimentu ne’e akontese.
Jornalista: Carla
Editor : Clementina Fatima
