Lian Orluli – Negosiante Rozalina da Costa, ho idade 35, husi suku Nunu-Mogue, Posto Aministrativu Hato-Builico, Munisípiu Ainaro, koalia ho lian triste, Nasaun Tomor-leste restaura nia independensia ba dala 21 ona, dezemvolvimentu iha baze sedauk lao ho diak, no lideransa politiku sira iha tempu kampanha hakilar bebeik hadia povu nia moris, kuando hetan fiar iha eleisaun, presija ukun povu ho dignu.
“Hanesan sidadun Timor oan hau triste tebes, tanba Timor leste nia independensia ba dala 21 ona, maibe’e infrastruktura iha baze seidauk lao ho diak, liu-liu estrada iha Postu Hato-builico nian aat tebes, kuando iha tempu udan transporte públiku sira labele halai to iha ami nia fatin. Bainhia atu ba merkado tenki lao ain deit, no sasan sira ami tenki tutur deit iha ulun, tanba ne’e hanesan povu senti triste los ho situasaun sira hanesan ne’e, sekarik Governu fou nebe’e maka povu fo fiar iha loron 21 de maio ne’e, presija ukun povu ho Dignu,tanba povu nia presija maka dejemvolvimentu diak no infrastruktura lao to iha baze” Rosalina ho lian Triste dada lia ho Lian Orluli, bainhira lao hela no tutur mos ho nia modo iha ulun atu ba fan iha merkado lama, kinta ( 18/05/2023)
Nu’udar Inan iha mos responsabilidade ba oan nain (5), no hakarak oan sira susesu iha futuru tanba ne’e Rozalina tenki lori produtu husi Postu Hato-builico ba fa’an to iha merkado Ainaro nune’e hodi bele sustenta familia Uma-laran no selu Oan ba Eskola.
“Produto ne’ebé mak ha’u fa’an, hau sosa tutan husi ema seluk mak hanesan Modo metan, modo mutina , Alfase , Fehuk roupa seinhora inklui mos Liss , maibe hau fa’an loron ida ha’u hetan deit $ 0.50 ou bele to’o $2.00 , tanbá sasan sira ne’e hau tutur deit iha ulun no la’o ain husi Nunu-mogue-lau, mai to’o Ainaro meudia tia, tanba nee ema ladun sosa hau nia produto, no hau nafatin esforu fan dunik tanba nesesidade uma laran maka obriga,” Rozalina dehan
Hanesan inan ho aman sempre iha mehi boot ba nia oan sira, tanba ne’e nia sempre esforsu buka osan hodi bele responde oan sira nia nesesidade eskola nian bainhira sira presija labele falta, no hakarak tebes oan nain lima bele suseu iha futuru
“Hau harak tebes hare hau nia oan sira susesu, iha sira nia estudu, tanba ne’e hau esforsu no tebes liu husi fan modo sira hensan ne’e osan balu hodi atende uma laran han nian no balu hau tenki rai ba oan sira nia presja iha eskola, maske dalaruma modo tahan sira ne’ebé hau fan ema ladun sosa tanba namalaek hotu, maibe’e sei la hamate hau nia espiritu buka osan ba oan sira,” nia hatutan
Rozalina mos apela ba Governu atu tau Merkadu iha Fatin ne’ebé mak diak no dignu atu nune’e Negosiante sira bele fa’an sira nia Produtu ho diak no bele atrai kompradores sira hodi sosa.
“ Husu ba Governu foun hadia merkadu iha munisipiu Ainaro iha fatin públiku atu nune’e Ami bele fa’an ami nia produto ho diakno mos, nune’e hodi atrai sosa nain sira husi Munispiu Suai , no mos husi Fatin seluk atu mai vizita hodi sosa ami nia sasan ne’ebé iha, tnba ainaro ne’e riku ba produto lokal inklui modo tahan” Rozalina hakotu
Editor: Lian Orluli
