Lian Orluli — Reprezentante Juventude husi suku Soro, postu administrativu Ainaro, Tome da Silva , sente triste ho lideransa polítika sira nia promete falsu iha palku komísiu kampaña nian, tanba povu presiza lideransa ida ne’ebé ukun ho fuan la’ós ho lia fuan.
“Ha’u hanesan joven ida iha esperansa boot ba lideransa polítiku sira bainhira eleitu iha eleisaun parlamentár tinan ne’e presiza ukun povu ho fuan, labele ho de’it lia fuan ne’ebé nakonu ho promesa falsu sira, ami joven presiza dezenvolvimentu di’ak no infraestrutura la’o iha munisípiu to’o ba iha suku,” Tome hateten ba jornalista Orluli iha nia knar fatin Benkel motor resintu Malmeta Ainaro, Kinta (11/05).
Nune’e, nia afirma liután katak, durante udan iha loron haat (4) nia laran rezulta rai halai no estrada balun kotu ona, tanba ne’e governu presiza tau atensaun lais ba problema ne’e.
“Udan monu rai durante loron haat nia laran estrada husi parte suku Soro liga ba suku Suro-Craik kotu, ne’e presiza Governu atu hadi’a lalais, tanba ami povu presiza movimentu ba mai, lae difikulta ami labele halo atividade hanesan bai-bain,” nia hateten.
Relasiona ho festa demokrasia tinan 2023 iha Timor-leste, partidu polítiku sira hala’o komísiu iha fatin-fatin hodi aprezenta programa ne’ebé sai prioridade hodi hetan votu iha eleisaun parlamentár, tan ne’e iha kampaña partisipasaun joven sira nian másimu hodi rona direta programa sira aprezenta iha komísiu.
Tanba ne’e mak, joven barak komesa hasai lian ba lideransa partidu polítiku sira katak “povu presiza ukun ho fuan la’ós ho lia fuan”.
Editor : Lian Orluli
