Lian Orluli— Nasaun barak iha mundu to’o agora luta hela atu kombate lixu tanba lixu ne’e bele lori dezastre ba nasaun bainhira estadu laiha polítika klaru kona-ba ambiente ne’ebé saudável. Ne’e duni joven ida hakarak hola-parte iha prosesu ne’e hodi kontribui ideia hakarak kombate lixu iha Timor-Leste.
Lixu nu’udar tipu rezíduo ne’ebé mai hosi orgániku no anorgániku, ne’ebé rezulta hosi lixu soe arbiru, espesialmente mosu hosi atividade umana no atividade produtiva sira
Lixu forma hosi materiál ho orijen ne’ebé diferente liuhosi atividade umana kada loron. Tradisionalmente, volume lixu iha Timor-Leste aumenta, tanba mudansa teknolojia iha sosiedade.
Tipu lixu ne’ebé oras ne’e lekar iha sosiedade nia leet mak hanesan; lixu doméstika, industriál, ospitalár, agríkola, eletrónika no lixu radioativu.
Lixu ne’ebé soe arbiru ho forma inkorreta ka laiha lixeiru (fatin soe foer) sei fó impkatu ba meiu ambiente no rekursu natural sira seluk. konsekuénsia husi lixu ba meiu ambiente mak hanesan kontaminasaun ba água potável.
Nune’e mós degradasaun espésie vegetál lokál sira, kontaminasaun solo (rai) no subsolo (rai okos), diminuisaun biodiversidade, modifikasaun paizajen terrestre no emisaun poluisaun.
Ho konsekuénsia hirak-ne’e halo joven ida ho naran Vicky Fonçeca ho tinan 25 alias ‘Achun lay’, moris iha munisípiu Lautem, ho mehi hakarak kontribui kombate lixu iha Timor-Leste, maske espetativa sei dook tebes.
Vicky envolve iha grupu Conservation of Environment Timor-Leste, ne’ebé lokaliza iha Polititeknika Hera, Universidade Nasionál Timor Lorosa’e (UNTL). Grupu Conservation of Environment Timor-Leste estabelese iha tinan 2019 ho misaun halakon su’ar husi sunu lixu no vizaun resikla produtu utilitáriu no produtu artistíka sira seluk.
Vicky Pacheco hala’o estudu iha Polititeknika Hera, fakuldade enjeñaria, departamentu indústria no nuudar inisiadór ba grupu refere hamutuk ho joven na’in-lima seluk hamutuk na’in-neen.
Joven ne’ebé oras ne’e livre ona teória, hakarak resikla lixu sira iha Timor-Leste tanba realidade hatudu katak sidade Dili hahú hamout ho lixu no lixu ne’e mós sai problema boot iha komunidade nia leet. Realidade seluk ne’ebé hatudu mak bainhira tempu udan lixu lekar iha kapitál Dili no hamosu mós inundasaun iha fatin-fatin.
Husi problema hirak-ne’e foin sa’e hamosu ideia ho espíritu voluntarizmu hamutuk ho joven sira envolve iha grupu Grupu Conservation of Environment Timor-Leste hamosu mákina inseneradór hodi halo resiklajen inklui resikla plástiku ba kombustível.
Relasiona ho kreatividade ne’ebé maka joven ne’e iha, Lian Orluli hodi buka tuir joven ne’ebé matenek ho kreativu ne’e.
Joven ne’e inísia idea ne’e hodi konserva ambiente liuhusi halibur lixu, hodi produs ba produtu foun ne’ebé bele utiliza fila-fali.
Pontu prinsipál ne’ebé Vicky prodús mákina inseneradór hodi halakon pensamentu sunu lixu. Nune’e mós halo resiklajen ba produtu utilitáriu no produtu artístika hanesan meza, kadeira, no obra enfeitasaun sira.
Grupu Conservation of Environment Timor-Leste halo resiklajen lixu plástixu ba kombustível ka mina ne’ebé bele utiliza fila-fali.
“Husi problema lixu ne’e rasik motiva ha’u hodi hamosu ideia hirak-ne’e sai hanesan alternative hodi solusiona problema lixu ne’ebé komesa hamout ona Timor-leste nia furak balun,” Vicky hateten ba jornalista Lian Orluli.
Husi produtu sira-ne’e sedauk hetan apoiu parte governu, maske ideia ne’e kontribui tebes iha nasaun Timor-Leste hodi solusiona problema lixu.
“Espera ho idea ne’ebé maka iha bele ajuda Timor leste hodi solusiona problema lixu ne’ebé maka oras ne’e daudaun hamout ona sidade Timor-Leste,” Vicky espresa ninia hanoin ba ambiente saudável.
Daudaun ne’e obra ka produtu sira-ne’ebé Vicky iha rai de’it iha dormitóriu UNTL Hera no nia espera bele hetan fatin própriu balun ba sustentabiliza atividade hosi grupu Grupu Conservation of Environment Timor-Leste.
Editor : Lian Orluli
