Juventude Loriku Asuwain
Hatutan Luta ba Independensia
Aten Brani se Hirus Matan iha Kilat nia Tutun;
Fuan latuku-tuku hasoru Bala Musan no Kroat;
Ibun Hakilar Liafuan Ukun Rasik’An;
Asuwain Duni.
Juventude Loriku Asuwain
Husi imi Aten Brani Liafuan Ukun Rasik’An ohin sai Realidade;
Husi imi Fuan mos Ran lulik Suli Marka Liafuan Liberdade iha Rai Lulik Lafaek;
Husi Imi Lian Siak Mundu Rona Terus no Susar MauBuibere nian;
Ho imi nia Mate Sosa duni Ukun Rasik’An.
Juventude Loriku Asuwain
Tinan lubun Ami Goja duni Ukun Rasik’An ida ne’e iha:
Imi lubun isin dodok Laiha Fatin
Imi lubun isin sei Fitar
imi lubun ruin naklekar
Imi lubun ruin Tohar.
Deskulpa Juventude Loriku Asuwain
Tamba barak mak seidauk hatene prosesu lubun ne’ebé imi halo ona ba Rai ne’e.
Juventude Loriku Asuwain
Imi lubun Bikan duku ona
Hakarak Ema barak loke nia Bikan
Maibe, barak mak Bikan sei Mamuk
Tamba Barak liu han lahatene An.
Juventude Loriku Asuwain
Imi Lian Laek duni Ona tamba Hakarak Lian Ukun Rasik’An ne’ebé ohin Sai Realidade ne’e.
Maibe, husu klamar nafatin Fanu Ami Juventude Ohin Loron atu halian no dignifika Ukun Rasik’An ida ne’e ho lolos tuir Mehi ne’ebé mak imi Hakarak.
Viva Juventude Loriku Asuwain
Viva MauBuibere
Viva Timor -Leste.
“Mário Mau-Lore Araújo”
Dare Ainaro, 11/11/2020
