Lian-Orluli-17/04/2026- Komisaun Nasional Eleisoes (CNE) Hala’o Edukasaun sivika konsolida Demokrasia no eleisaun integridade iha Ainaro, kona-ba faze sira husi prosesu ne’ebé hala’o ona, nune’e mós atu finaliza preparasaun ba ajenda importante nian, aseitasaun ba podér administrativu lokál ne’ebé sei desentraliza.
Comisáriu Olavio da Costa Monteiro de Almeida fó sai katak comisaun Nasionál Eleisaun (CNE) hala’o enkontru koordenasaun ho Governu Municipiu no partidu polítiku sira hotu iha Munisípiu Ainaro ho objetivu atu ko’alia kona-ba faze sira husi prosesu ne’ebé hala’o ona, nune’e mós atu finaliza preparasaun ba ajenda importante nian, aseitasaun ba podér administrativu lokál ne’ebé sei desentraliza.
“Ami hakarak garante katak parte hotu komprende prosesu ne’ebé la’o hela no prontu ona ba etapa tuir mai”,dehan Komisáriu Olavio.
Nia subliña, momentu ne’e nu’udar oportunidade importante ba komunidade atu tama ba faze foun liu hosi realizasaun eleisaun munisípiu ne’ebé demokrátiku. Nia subliña liu tan, objetivu prinsipál ida hosi prosesu ne’e mak atu hametin autoridade lokál no enkoraja desentralizasaun administrativa, nune’e governu bele hakbesik liu ba povu no responde liu ba nesesidade sira iha nivel municipal.
Fatin hanesan Prezidente Autoridade Municipiu Ainaro, Manuela Georjina Carmo Bucar Corte-real, subliña importánsia husi Autoridade Municipiu nia knaar hodi apoia dezenvolvimentu rejionál tuir planu governu nian no aspirasaun komunidade lokál nian.
Iha ninia deklarasaun, nia afirma katak Prezidente Autoridade Municipiu Ainaro agora daudaun foka hela ba preparasaun internu sira hodi asegura programa hotu-hotu aliña ho polítika nasionál sira.
“Ohin ami ko’alia kona-ba Autoridade Municipiu nia no preparasaun sira tuir planu governu nian” PAM hatete.
PAM subliña mós katak Autoridade Municipu Ainaro iha responsabilidade ne’ebé signifikativu hodi dezenvolve autoridade ne’e tuir espetativa komunidade nian. Nia fiar katak autoridade ne’ebé maka fó tenke utiliza ho di’ak liu atu promove progresu nivel munisipa.
“Nu’udar lider feto ida, nia espresa nia kompromisu atu asegura katak polítika hotu-hotu ne’ebé adota iha impaktu pozitivu. Feto ida ka inan ida hakarak buat ruma atu funsiona ho di’ak ba komunidade ida-ne’e”,nia hatete.
Aleinde ne’e, nia enkoraja komunidade atu espresa ho ativu sira nia opiniaun no aspirasaun sira. Nia fiar katak Autoridade Municipu mak importante ida ba partisipasaun komunidade nian iha planeamentu dezenvolvimentu.
“Autoridade Municipiu hanesan reprezentante importante ida hodi fó hanoin kona-ba planu sira Ainaro nian. Ho espíritu kolaborasaun entre governu no komunidade, hein katak dezenvolvimentu iha Ainaro sei efetivu liu no aliña ho nesesidade rezidente komunidade sira nian”PAM hakotu.
CNE hein katak parte interesada hotu bele servisu hamutuk ho konstrutivu hodi garante prosesu demokrasia la’o ho di’ak iha nivel munisípiu.
Jornalista: Carla Ximenes Xavier
Editor : Clementina Fátima
