Lian Orluli, Ainaro — 13 Agostu 2026, Empreza HABURAS SARAI, LDA kontesta prosesu klasifikasaun no atribusaun projetu iha Programa Dezenvolvimentu Integradu Munisípiu (PDIM) Ainaro ba tinan 2026. Empreza ne’e husú autoridade kompetente atu fó klarifikasaun kona-ba kritériu avaliasaun, dokumentus téknikus no baze legal ne’ebé uza durante prosesu tender.
Diretur HABURAS SARAI, LDA, Mario Nunes Simenes Carvalho hateten katak antes ne’e empreza iha klasifikasaun B no prepara dokumentus tuir kritériu ne’ebé determina. Maibé, iha prosesu PDIM 2026, empreza ne’e la pasa.
“Hau nia kompania HABURAS SARAI, LDA la pasa. Sira dehan katak problema iha dokumentus tékniku, maibé hau hakarak husu klarifikasaun tanba ami prepara dokumentus tuir regra no kritériu ne’ebé iha,” dehan Mario.
Empreza husú transparénsia iha prosesu tender
Mario mós questiona transparénsia prosesu tender no husú autoridade atu fó esplikasaun kona-ba oinsá empreza sira avalia, klasifika no determina vencedor ba projetu sira.
Nia mós levanta alegasaun kona-ba posibilidade favoritizmu, partidarizasaun no konflitu interese familiar iha prosesu atribusaun projetu. Tuir nia, iha alegasaun kona-ba relasaun família entre ema balu ne’ebé iha pozisaun relevante no ema sira ne’ebé, tuir nia alegasaun, hetan projetu.
Maibé, alegasaun hirak-ne’e seidauk hetan verifikasaun independente no la bele konsidera hanesan faktu konfirmadu.
Mario husú autoridade relevante atu fó klarifikasaun públika kona-ba alegasaun konflitu interese no relasaun família ne’ebé nia levanta.
“Hau la hakarak deit protesta. Hau hakarak hatene regra ne’ebé uza no oinsá prosesu ne’e lao. Se iha sala, presiza hadia atu dezenvolvimentu iha Ainaro bele lao ho justisa no transparénsia,” nia dehan.
Planeamentu: Tender iha etapa no prosedimentu
Sekretáriu Planeamentu Autoridade Munisipiu Ainaro, Albertino de Araujo, hateten katak prosesu tender tenke tuir etapa no prosedimentu sira ne’ebé determina, hahú hosi publikasaun avizu, simu dokumentus, avaliasaun, verifikasaun to’o avaliasaun final.
“Prosesu hahú husi taka sai avizu, simu dokumentus, avaliasaun dokumentus, verifikasaun to’o avaliasaun final. Rezultadu ne’e determina kompania sira ne’ebé sai vencedor ba projetu,” dehan Albertino.
Kona-ba alegasaun relasaun família entre autoridade no empreza vencedora, Albertino hateten katak nia seidauk iha informasaun kompletu kona-ba asuntu ne’e.
“Kona-ba relasaun família ho Prezidente Autoridade, hau seidauk hatene. Informasaun ne’e presiza buka tuir no husú klarifikasaun ba Diretor PDIM,” nia dehan.
Kampu Futebol Ainaro ho orsamentu besik US$375,000
Iha tinan 2026, Munisípiu Ainaro iha projetu konstrusaun no dezenvolvimentu infraestrutura ne’ebé uza orsamentu públiku.
Entre projetu hirak-ne’e, (PACELIA NAROMAN UNIP.LDA) hetan projetu konstrusaun Kampu Futebol Ainaro, ho valor besik US$375,000. Servisu konstrusaun ba projetu ne’e sei lao hela.
Projetu ho valor boot hanesan ne’e envolve osan públiku, tanba ne’e, transparénsia, responsabilizasaun no kumprimentu prosedimentu aprovizionamentu públiku sai aspetu importante atu garante katak osan Estadu uza ho responsabilidade no tuir lei.
Kódigu Aprovizionamentu no Kontratu Públiku foun
Iha 8 Janeiru 2025, Governu publika Dekretu-Lei N.º 1/2025, ne’ebé aprova Kódigu Aprovizionamentu no Kontratu Públiku foun. Diploma legal ne’e iha objetivu atu moderniza prosedimentu aprovizionamentu no kontratu públiku, no promove efisiénsia, transparénsia no dezenvolvimentu sustentável.
Iha kontestu ne’e, prosesu tender ba projetu públiku tenke hala’o ho transparénsia, tuir prosedimentu legal no garante tratamentu justu ba empreza sira ne’ebé partisipa.
Alegasaun sei hein resposta hosi parte relevante
Até notísia ida-ne’e publika, alegasaun kona-ba diskriminasaun, favoritizmu no konflitu interese seidauk hetan verifikasaun independente.
Parte autoridade sira ne’ebé temi alegasaun iha oportunidade atu fó resposta no klarifikasaun kona-ba asuntu hirak-ne’e.
Kontestaun hosi HABURAS SARAI, LDA agora husú resposta klaru kona-ba prosesu klasifikasaun, kritériu avaliasaun no atribusaun projetu PDIM Ainaro 2026.
Transparénsia iha prosesu aprovizionamentu públiku importante tebes atu garante konfiansa públiku no asegura katak projetu sira ne’ebé uza osan Estadu bele fó benefísiu ba komunidade no dezenvolvimentu Munisípiu Ainaro.
Jornalista: Carla/Elfiana
Editor: Clementina Fatima
