Lian Orluli, Maubisse, 15 Jullu 2026 – Aldeia lima iha suku Maulau, Postu Administrativu Maubisse sedauk hetan Roman husi eletrisidade durante dekade rua ne’e, Komunidade sira, hato’o kestaun ba Prezidente Autoridade Munisípiu Ainaro iha vijita servisu tuir programa Governu Konstitusionál da-9 iha loron Kuarta (15 Jullu).Preokupasaun ne’e laos deit iha eletrisidade maibe’e kondisaun estrada ne’ebé aat hosi aldeia sira ba to iha suku, falta bee-moos, defikulta tebes komunidade sira iha area remotas.
Reprezentante komunidade ida hatete katak estrada sira ne’ebé liga entre aldeia sira sei iha kondisaun ne’ebé ladi’ak no sai difisil liután atu atravesa durante tempu udan. Liután, aldeia lima iha área Maulau seidauk iha roman eletrisidade, enkuantu rezidente barak kontinua luta atu asesu ba bee-moos.
Komunidade mós husu ona atu governu halo atendimentu rejistu sivíl iha nível aldeia liu hosi Ministériu Justisa no STAE. Sira hein katak prosesamentu ba dokumentu sira, hanesan Bilhete Identidade Nasionál (BI), no kartaun eleitorál sira bele maneja besik liu ba komunidade sira iha area remotas, tanba rezidente barak maka seidauk iha dokumentu esensiál sira.
Xefe suku Maulau Juliao Martins hatutan tan, laos deit estrda mak defekulta maibe’e roman husi eletrisidade mos la asesu durante tinan barak
“Aldeia ne’ebe seidauk asesu ba roman elitrisidada mak hanesan, Lumoluli, Hatucade, Maleria, inklui sebagian husi, Aldeia Lacamalicau no Usululi, mak seidauk hetan roman ba lina Elitrisidada, liu husi vizita servisu ida ne’e husu ba governo lokal reprejenta nasional, tau atensaun mos ida problema sira ne’e”, dehan Lideransa komunitariu ne’e.
Hatán ba pedidu hirak ne’e, Prezidente Autoridade Munisípiu Ainaro haktuir katak vizita traballu ba Maulau ne’e ho objetivu atu rona komunidade nia nesesidade diretamente enkuantu sensibiliza mós servisu governu nian. Tuir nia, feedback ne’ebe hetan husi komunidade sei sai baze hodi formula programa dezenvolvimentu hodi hato’o ba governu sentral.
“Ami hakarak haree komunidade nia situasaun diretamente no rona aspirasaun husi inan-aman sira, veteranu sira, no jerasaun foun sira atu nune’e kestaun sira ne’ebé hasoru bele hatama iha planu dezenvolvimentu no hato’o ba governu sentrál,” dehan Prezidente Autoridade Munisípiu Ainaro.
Iha biban ne’e, Prezidente ho komitiva mós divulga informasaun principal husi vizita ne’e, hodi partilla informasaun ba komunidade suko sira kona-ba polítika desentralizasaun administrativa no poder lokál inklui diálogu ho komunidade sira kona-ba progresu dezemvolvementu infrastrutura bázika sira, ne’ebé implementa ona no ida ne’ebé maka autoridade presiza tau iha planu hodi hadia nune’e koresponde ba preukupasaun komunidade nian iha kada suku.
Jornalista : Elfiana/Carla
Editor : Clementina Fátima
