Lian Orluli-Dili— Prezidente Tribunal Rekursu, Dr. Deolindo dos Santos deklara katak prosesu auditoria ba kazu Ró Haksolok ne’ebé sai polemika no konsumu públiku iha Timor-Leste oras ne’e pelumenus atinzi ona 60%.
Lia hirak ne’e hato’o husi Prezidente Tribunal Rekursu hafoin remata reuniaun regular ho Prezidente da Republika Terça- feira, dia 01 de Augusto 2023 iha Palasiu Prezidensiál Bairo Pite Dili.
“Auditória ba Ro Haksolok Cámara de Contas halo auditória ne’e pelumenus prosesu 60% ona, durante Cámara de Contas ezerse nia funsaun no klaru katak ita bo’ot sira divulga buat balun de’it, no balun ne’ebé la divulga mesmu públika iha website Cámara de Contas nian”. Dehan Prezidente Tribunal Rekursu. Tersa (2/08/23)
Nia komenta katak Auditoria ba kazu Ró haksolok iha ZEESM (Zona Ekonomiku Espesiál Sosial Merkadu) halo dala rua ona no servisu ne’e nudar kompetensia ba Camara de Contas nian, rekomenda ona buat lubuk ida ona no Lei la permite atu Tribunál ba husu tuir Instituisaun sir aseluk nia kompetensia.
“Auditória ba ZEEMS halo dala rua ona no ikus liu aprova iha Outubru ka Novembru 2021 signifika aprova tiha ona, ne’e servisu ne’ebé lei fó kompeténsia ba Camara de Contas atu halo no halo hotu ona no atu halo oinsá ba oin ne’e laos kompeténsia Camara de Contas ona, maibé Institutusaun sira seluk ne’ebé iha kompeténsia atu hare ida ne’e, tanba lei la permite para Tribunál ba husu tuir fali Institutusaun sira nia servisu to’o iha ne’ebé ona, tanba ida ne’e mak Camara de Contas ezerse nia kompeténsia ona, no rekomenda buat lubuk boot ida iha ne’eba atu la’o halo nusa, konforme kompeténsia entidade sira ne’ebé lei fó kompeténsia atu halo”. Nia argumenta.
Entertantu prosesu konstrusaun ba Ferry Ro Haksolok ne’e asina kontratu dezde tinan 2014 entre Governu no Companhia husi Portugal naran Atlantic Eagle Ship Building (Sigla Inglés) ho kustu Millaun Euro 13,7 no inagura ona iha loron 26 fulan Maio tinan 2017 iha Sidade Figueira da Foz Portugal maibe to’o tinan nen (6) ona mos Ró refere ladauk mai tamba iha problema interna kompanhia nian.
Editor : Lian Orluli
