Lian Orluli- Ministériu Saúde (MS) destaka ona mediku haat nulu resin haat koloka iha postu 23 ne’ebé durante ne’e mamuk hela.
Diretúr Servisu Saúde Munisípiu Ainaro, Benedito Mendonça Dos Santos hateten, funsionáriu foun sira ne’e Ministériu Saúde rekruta iha Díli fulan kotuk hodi bele subtitui fali funsionáriu lima nulu resin lima ne’ebé termina ona sira nia kontratu iha fulan kotuk.
Tamba ne’e ba Ainaro Ministériu Saúde destaka ona funsionáriu haat nulu resin haat ne’ebé iha Segunda-feira (18/03/2024) ne’e aprezenta a’an ona iha autoridade munisípiu Ainaro.
“Funsionariu sira ne’e sei hala’o kna’ar tuir ida-idak nia área mak hanesan médiku na’in 3, infermeiru 11, partera 10, farmasia 4, promosaun saúde na’in 9, tekniku administrasaun nain 5, klener 2.Ita nia postu saúde iha 23 no sentru saúde haat no internamentu, rekrutamentu ne’e la’os hotu de’it iha ne’e maibé ita rekruta pajiadamente, ida ne’e mak primeira faze sei mosu tan segunda faze, bazeia ba ita nia nesesidade ne’ebé ita presiz , tamba iha munisipiu Ainaro Misnisterio saude foin mak destaka ona funsionario haat nulu resin haat (44) ne’ebe iha segunda feira semana kotuk liu ba loron dia (18/03/2024), sira apresenta a’an ona iha Munisipiu Ainaro”, splika Diretúr Servisu Saúde Munisípiu Ainaro, Benedito Mendonça Dos Santos.
Reprezentante Prezidente Autoridade Munisípiu Ainaro Atual Sekretariu Dois Munisípiu Ainaro Albertino Dé Araújo, apresia programa nunu governu ne’ebé rekruta ona mediku sira hodi destaka iha munisípiu Ainaro.
“Iha biban ne’e ha’u kontente iha hanoin ida husi ita nia governu sentrál ho mehi sira ne’ebé uluk mehi hela, agora komesa tau iha realidade balun, maske mai ita nia ema sira mai atu tulun, mai ho personalidade ida ne’ebé mak ita bele dehan katak, seidauk to’o tarjetu, maibé iha ema 44 ne’e bele dehan katak sufisente ona para atu halo atendimentu ba ita nia povu sira”,dehan Albertino Dé Araújo.
Enkuanto ne’e médiku foun sira partisipa iha formasaun kona-bá fó aimoruk lumbriga Albendazole ba labarik sira ne’ebé oferese husi organizasaun saúde mundial WHO iha salaun administrasaun munisípiu Ainaro.
ESTJ: Reny
Editor : Lian Orluli
