Lian Orluli, 20 Janeiru — Servisu Saúde Munisipiu Ainaro, liu-husi Sentru Saúde Postu Hato-udo, hala’o atividade Edukasaun Promosaun Saúde, kombina ho servisu saúde integradu, inklui saúde nehan no imunizasaun HPV, iha Postu Saúde Hato-Udo Suku Leo-Lima.
Atividade ne’e hala’o hodi responde ba prevene risku moras iha tempu udan no nu’udar esforsu prevensaun moras hada’et iha komunidade no eskola sira, partikularmente iha Eskola EBF Cai-seru iha Suku Leo Lima.
Asistente Promosaun Saúde, Domingos Tilman João Dos Reis, esplika katak atividade ne’e ho objetivu atu hasa’e konsiénsia públiku kona-ba importánsia ámbitu moris ne’ebé moos no saudavel, enkuantu prevene mós moras oioin ne’ebé dala barak mosu bainhira udan-boot.
“Ami iha Servisu Saúde Munisipiu Ainaro, liu hosi JPHO EPS, hala’o hela edukasaun promosaun saúde ba públiku en-jerál. Dadaun ne’e, Sentru Saúde Komunitária Hato-Udo, hamutuk ho ekipa tékniku no pesoál saúde sira, implementa hela programa integradu saúde nian iha Suku Leo Lima, Suku Foho Ai-liku, no iha eskola Cai-seru,” nia hatete.
Nia hatutan, matéria promosaun saúde ne’ebé aprezenta ba komunidade mak hanesan prevensaun moras Dengue, rabia, no moras komún oioin ne’ebé afeta beibeik ba komunidade, uza meiu edukasionál ne’ebé fasil atu komprende.
Entretantu, atividade promosaun saúde iha Eskola EBF Cai-seru foka liu ba labarik sira. Materiál ne’e kobre ijiene pesoál, prevensaun diarreia, isin-manas dengue, moras kulit, varisela, no lumringan (infesaun verme nian) ne’ebé maka komún iha labarik sira.
“Ami deteta labarik balun hetan moras lumringan tanba atividade sira iha jardín no ambiente eskola nian. Tanba ne’e, tema prinsipál ohin nian maka ijiene pesoál no prevene moras sira ne’ebé baibain afeta labarik sira”, esplika Domingos.
Aleinde edukasaun, ekipa Sentru Saúde Komunitária Hato-Udo mós fornese servisu saúde direta, hanesan kontrolu nehan no tratamentu ba estudante EBF Cai-seru hanesan parte ida husi programa saúde oral. Ekipa saúde fó prioridade ba ezame dentál ba estudante sira.
Aleinde ne’e, atividade ne’e inklui mós imunizasaun ba labarik sira, inklui imunizasaun SBP no HPP ba labarik tinan neen, no imunizasaun HPV ba labarik-feto sira ne’ebé prienxe rekizitu idade nian.
Servisu Saúde Munisipiu Ainaro hein katak liu-husi atividade ne’e, komunidade no estudante eskola sira bele komprende di’ak liután importánsia prevensaun moras sedu, liu-liu iha tempu udan, no apoia prevensaun moras ba jerasaun ne’ebé saudavel iha futuru.
Jornalista : Fanesia Alves
Editor: Clementina Fatima
