Lian Orluli, 14 Maiu 2026- Estrada Protokolu iha área Nunomoge, espesífikamente iha suku Nunomogue, Aldeia Nunomoguelau, Bairo Hali Rua (H2), hetan ameasa atu monu tanba udan-boot ne’ebé maka atu hamosu erosaun durante loron tolu tuituir malu
Komunidade sira nia monitorizasaun hatudu katak estrada ne’e komesa nakfera husi rota sorin karuk diresaun husi Dili-Ainaro. Erozaun ne’ebé kontinua akontese ne’e konsidera hanesan perigozu ba motorista sira ne’ebé liu husi fatin refere.
Komunidade sira preokupa katak se udan-been kontinua aumenta, estrada asesu prinsipál ne’e bele kotu kompletamente, no sei fó inpaktu mós ba komunidade nia uma. Estragus ba estrada la’ós de’it perturba komunidade sira-nia atividade loroloron, maibé mós iha potensiál atu difikulta distribuisaun produtu agríkola no nesesidade báziku ema hotu nian iha área ne’ebá.
Komunidade sira husu ba governu atu foti kedas pasu emerjénsia molok kondisaun estrada sai grave liután no halo rota transporte prinsipál kotu.
“Ita presiza Governu Rejionál liuhosi ministériu relevante sira atu hadia kedas estrada ne’e, tanba ne’e estrada internasionál entre nasaun rua, Timor-Leste ho Indonézia liuhosi fronteira Covalima,” dehan Jaime
Tuir Jaime, impaktu husi rai-monu ne’e la’ós de’it fó ameasa ba estrada, maibé ameasa mós komunidade balun nia uma hale’u iha fatin ne’e. Rai iha fatin refere komesa nakfera no besik ona ba ema nia uma ninin.
“Ami nia rekomendasaun maka governu halo intervensaun lalais. Se lae, ema sira ne’ebé hale’u lokalizasaun ne’e bele afetadu, tanba rai ne’e besik ona uma nia tatis,” nia dehan.
Sumáriu: Udan boot durante loron tolu halo estrada prinsipál iha área Nunomoge liga Munisípiu Covalima, hetan rai-halai no hetan ameasa atu erosaun.komunidade sira husu ba governu atu foti kedas asaun emerjénsia tanba estrada ne’ebé hetan estragu la’ós de’it fó perigu ba motorista sira, maibé ameasa mós komunidade sira-nia uma no difikulta atividade ekonómika no asesu ba ligasaun, Timor-Leste-Indonézia.
Jornalista: Carla/Lucya/Elfiana
Editor: Clementina Fatima
