Lian Orluli— Xefe Casa Civíl Prezidensia Repúblika, Sra. Jesuisa Gomes hateten dadus sira iha Timor-Leste hatudu katak labarik sira ne’ebé infrenta problema raes badak hamutuk 47%, nia deklara foin dadauk ne’e iha okaziaun Gabinete Prezidensia Repúblika selebra asina momerandu entendimentu (MoU) ho Agensia WFP (World Food Programme).
” Iha Timor-Leste labarik sira ho pursenru 47 barak rais badak ne’e, tanba ne’e ita hotu tenke toma atensaun ba ida ne’ebá i servisu hamutuk ho agensia hotu-hotu liu-liu oinsá atu haree kona-ba nutrisaun ne’ebé di’ak, nutrisaun ne’ebé di’ak ne’e komesa husi inan sira nia isin, kuandu sira moris mai hetan Susuben inan nian, no mós sira tinan 3 to’o tinan 5, sira eskola iha Pre-eskolár ne’e presiza hetan nutrisaun di’ak para bele kontribui ba dezenvolvimentu sira nia kakutak, no mós abilidade sira seluk ne’e ” Dehan Xefe Casa Civil ne’e.segunda(7/08/23)
Tamba ne’e maka Preziente Republika, Dr José Ramos Horta buka esforsu atu servisu hamutuk ho entidades oi-oin oinsa atu bele rezolve problema má nutrisaun inklui raes badak iha Timor-Leste no liu husi asina akordu ho Agensia WFP hanesan inisiativa ida hodi responde ba ida ne’e.
” Ohin Prezidénsia da Repúblika asina momerandu ida ho World Food Programme (WFP), liu-liu foka ba iha seguransa alimentar no nutrisaun, Prezidente iha prióridade bo’ot kona-ba oinsá atu halakon má-nutrisaun iha Timor-Leste i Prezidente hakarak mellora atendimentu ba inan isin rua, Inan sira fó susu hela oan no labarik ki’ik sira, liu-liu labarik sira Pre-eskolár ne’e prióridade Prezidente nian, tanba ne’e maka servisu hamutuk ho WFP, liu-liu foka ba iha advokásia nian, liu-liu oinsá haree kona-bá istória di’ak sira, lisaun aprendizazem sira ne’ebé que bele partilha ho nasaun sira seluk, nune’e mós halo advokásia ba asuntu seguransa alimentar no nutrisaun nian “ Eis Prevedor ne’e hatutan.
Iha fatin hanesan reprezentante Country Diretór, World Food Programme (WFP) Timor-Leste, Alba Cecília Garson Olivares haktuir, reforsa katak asinatura Memorandu de Entendimentu ne’e hodi promove koperasaun atividade sira entre Edifísiu Presidente no Programa Alimentar Múndial (PAM) i Koperasaun atividade sira ne’e defini iha MDE foka ba área prinsipal lima.
“Ohin loron, pasu ida atu melhoria advokasia seguransa ai-han no nutrisaun iha Timor-Leste, ne’ebe reforsa liuhusi asinatura Memorandu de Entendimentu (MDE) hodi promove koperasaun atividade sira entre Edifísiu Presidente no Programa Alimentar Múndial (PAM), i Koperasaun atividade sira ne’e defini iha MDE foka ba área prinsipal lima inklui sensibilizasaun importansia segruansa ai-han no nutrisaun iha nasaun, sublinha ligasaun entre mudansa hahalok sosial, nutrisaun no saúde, no bolu atensaun ba seguransa ai-han no nutrisaun no kestaun politika no advokasia ne’ebe relevante Memorandu de Entendimentu ne’e bazeia ba atividade existente sira entre WFP no Governu hanesan apoiu ne’ebe fornese ona fulan kotuk, hodi asegura realizasaun seguransa ai-han Timor-Leste nian, no dezafiu ne’ebé aprezenta ona iha eventu Simeira Sistema Ai-han Nasoens Unidas iha Roma“. Relata Reprezentante Country Diretór WFP ne’e.
Enertantu durasaun ba Momerandu de Entendimentu ne’e sei lao durante tinan 2, hahu husi 07 de Agostu de 2023 to’o 31 dezembru 2025, asina Momerandu de Entendimentu ne’e halao iha Palasiu Prezidente Nicolau Lobato, iha loron 07 fulan Augusto tinan 2023.
Editor : Lian Orluli
