Lian Orluli– komunidade Ainaro tempu udan konsumu Bee-Merak, signifika kapasidade jestaun BTL.EP seidauk masimu
Lian hirak ne’e hato’o husi Membru Konseillo Juventude Munisípiu Ainaro, Elias Pereira Xavier Cardozu iha entervista, tempu udan komunidade iha Ainaro konsumu fali bee-merak signifika kapasidade jestaun BTL.EP sedauk masimu, tenki hadia internalmete jestaun BTL.EP nian
“Agora udan boot komunidade sira konsumu bee-merak, lolos ne’e sira konsumu bee-moos, tamba tempu udan hanesan ne’e persija bee-moos, mais bee -merak fali ne’e signifika katak kapasidade gestaun husi BTL.EP Ainaro seidauk masimu, se bee nee foer signifika katak fatin kapturasaun bee, iha bee ulun seidauk halo manutensaun didiak, sé husik livre hela entaun tahu nurak sira iha laran ne’e sei fo impaktu ba kapturasaun iha bee ulun, no sira ne’ebe mak uja bee-moos ne’e tenki konsumu fali bee merak.” Dehan Elias
Reprezentante Konsellu Juventude munisípiu Ainaro ne’e hatutan, ba ekipa BTL.EP atu kontrola no hadia jestaun internalmente iha BTL.EP, ho rajaun tamba ekipa BTL.EP la kontrolu ho masimu. Komunidade kumpri ona dever hodi selu taxa, osan ne’e hodi halo manutensaun fasilidade ne’ebé maka povu nian
“Kolia Kona ba bee-moos ne’e nesesidade fundamentu povu nian, iha lei garante katak bee nee ema hotu tenki asesu, povu kumpri ona sira nia dever ka selu ona taxa fulan-fulan ba banko ne’ebe mak kolekta diretamente husi BTL.EP, osan ne’e para atu halo jestaun no manutensaun ba fasilidade ne’ebe mak povu nian, BTL.EP tenki hadia jestaun internalmente iha BTL.EP, tamba sira nia servisu la masimu.”dehan Elias Pereira
Nia mos rekomenda ba funsionáriu BTL.EP atu halo jestaun no hadia fali fasilidade bee-moos iha Ainaro,tanba konsumedores sira presiza Konsumu bee mós
“Rekomenda deit katak osan ne’ebe mak kolleta tenki haree assuntu ne’e, se lae hanoin mak kolleta osan de’it maibe kapasidade kontrolu bee-moos ladun masimu, husu ba BTL.EP tenki halo gestaun ida di’ak hadia fali fasilidade bee-moos nian, ida ne’e mak importante.” Nia rekomenda
Kordenador BTL.EP Jermano de Araújo hatan ba Preokupa husi Konsumedores sira nian katak, Bee ne’ebé merak bainhira iha tempu udan kauza husi infiltrasaun la funsiona ho di’ak, tanba rai-henek hodi filtru bee mós nian komesa mihis no la merese ona, ahun ruin husi bee kaer metin tia ho rai-henek, nune’e hodi fo impaktu ba infiltrasaun bee mós nia labele la’o ho di’ak
“Problema ho distribuisaun be’e la ho kualidade kauja husi sistema infitrasaun bee la funsiona ho di’ak tamba rai-henek ne’ebe fo filtru ba bee ne’e mihis no la merese ona, tamba kaer metin ho kapur rahun hansan tia fatuk, kauja seluk mak iha impaktu husi udan no operador sira dala ruma sai hotu ba terenu entaun bain-hira udan be’e ne’ebé direta husi mota la konsege taka iha bee ulun nune’e hodi be’e mereka hama hotu ba tanki laran” Afirma Kordenador BTL.EP Jermano
Kordenador ne’e hatutan,” bain hira be’e maran iha tempu udan signifika, husi ekipa servisu operador maka taka hodi prevene bee mereka tama ba tanki laran” nia hatutan
Kordenador BTL.EP subliña tan, iha suku Soro durante fulan haat besik lima la asesu ba bee mós kauja husi ahu ruin ne’ebé nakonu iha kanu bee nian, ekipa sedauk bele halo manutensaunnba kanu sira tanba proposta sedauk aprova husi nasionál
“Suku Soro kategoria kuaze uma kain atus rua resin, iha Ainaro kuaze iha de’it atus ida resin, Soro nia problema kuaze fulan haat ona bee la ba, tamba kauza husi ahu ruin ne’ebe nakonu iha kanu, too agora ami seidauk troka, ami halo hela proposta ba nasional maibe seidauk iha resposta. Ami husi ekipa BTL.EP atu troka fali kanu ba suku Soro, depois tama ho kontador, atu nune’e tempu bailoron Soro nafatin konsumu bee, maibe kanu sira ne’e ahu ruin nakonu iha laran, entaun bee labele baa, kanu ne’e troka bele bailoron ka udan mos Soro hanesan hotu ho Ainaro.” Hateten Kordenador BTL.EP
kordenador BTL.EP husu Komunidade sira tenki rejerva bee-moos iha uma, bainhira iha tempu udan maka akontese bee merak bele konsumu dadaun bee ne’ebé prepara hela, aleinde ne’e karik loke tornera maka hetan bee merak, husik lai menutu balu nune’e to bee mós foin bele konsumu
“Atu apela ba kliente sira katak agora dadaun ne’e tempu udan no anin, dala ruma ami la konsege traba ou hapara bee ne’ebe mak merak, tanba ne’e liu husi biban ne’e ami hatete bebeik katak, ita boot sira presija rejerva bee iha bidon, masa antes udan, karik imi loke tornera mak bee merak di’ak liu taka tia hein too minutu 2 ou 3 mak loke fali.” Hakotu Kordenador BTL.EP.
Entretantu Total uma kain 1.113 inklui Suku Soro mak konsumu bee iha Munisipiu Ainaro postu Administratiu Ainaro Vila. Totál reseitas ne’ebé rekoilla husi konsumedores sira, husi tinan 2024 hatama reseitas osan $ 42.632,85 centabus, iha tinan 2025 fulan Janeiru rekoilla osan $ 362,64 centabus, husi kliente ne’ebé konsumu be’e mós no instituisaun sira hotu iha Munisípiu Ainaro.
Jornalista: Lucya
Editor : Lian Orluli
