Lian Orlui– Jornalista na’in sanulu-resin-rua husi mídia komunidade no online Lian Orluli ofisialmente simu sertifikadu Jornalizmu Fundamentál husi CI no ABCID Treinamentu ne’e ho objetivu atu haforsa kapasidade jornalista lokál sira nian hodi kompriende no aplika prinsípiu báziku jornalizmu ho kualidade.
Partisipante formasaun sira mai husi mídia, Rádiu Komunidade Laklubar, Rádiu Komunidade Balibo 5, no Mídia Online Lian Orluli. Programa ne’e la’ós de’it ekipa jornalista sira ho koñesimentu báziku maibé mós introdús konseitu avansadu sira ne’ebé relevante ba tipu mídia oioin husi rádiu, televizaun, mídia online, to’o jornál sira.
“CI hakarak garante kualidade serbisu ne’ebé prodús husi mídia, tanba ne’e CI haka’as-an atu halo formasaun sira ba jornalista hotu ,” dehan reprezentante CI Person in chief of Training DADM CI, Maria Bibel iha ninia observasaun.
Mídia online Orluli ne’e, halo kobertura ativu kona-ba asuntu lokál sira iha Ainaro no asesivel ba komunidade luan liu, konsidera nu’udar parseiru estratéjiku iha divulgasaun informasaun ne’ebé loos no inkluzivu. Tanba ne’e, harii kapasidade ba ninia jornalista sira sai nu’udar xave fokus husi formasaun ida ne’e.
Hafoin partisipa iha programa ne’e, partisipante sira ofisialmente sai alumni ba kursu online ABCID, ne’ebé oferese módulu formasaun jornalizmu oioin bazeia ba nesesidade mídia lokál nian.
“CI sei kontinua hala’o formasaun iha tinan oin. Primeiru-Ministru to’o fó ona apoiu orsamentál substansiál ba formasaun jornalista iha tinan oin,” reprezentante CI ne’e kontinua.
Iha okaziaun hanesan, Fernanda Maria, Koordenadora Rai-laran ABCID nian, afirma katak formasaun ne’e nu’udar rezultadu husi kolaborasaun besik entre CI Timor-Leste ho ABCID. Inisiativa ida ne’e ho objetivu atu hametin prezensa mídia lokál foun sira nune’e sira bele sai lian ba povu.
“Espesifikamente ami dezeña formasaun ne’e atu fó apoiu ba mídia lokál sira ne’ebé foin harii, hodi fó dalan ba sira atu hato’o povu nia lian ho profisionál no étika liután,” Fernanda esplika.
Nia nota katak dezde koperasaun parseria entre CI no ABCID iha 2023, sesaun formasaun lubuk ida maka hala’o ona bazeia ba nesesidade loloos hosi mídia lokál sira iha Timor-Leste. Treinamentu ne’e espesifikamente dirije ba jornalista sira ne’ebé iha interese atu esplora plataforma jornalizmu ABCID nian, ne’ebé fornese kursu online kona-ba baze jornalizmu nian.
“Hanesan Jornalizmo foun ida sente kontenti tebes partispa iha formasaun ida ne’e, eleva tebes jornalista foun sira ne’ebé maka hakarak envolve iha area jornalismu nian” dehan Jornalista Altino da Silva Sarmento
Entertantu Formasaun ne’e hala’o durante loron lima, Jornalista ne’ebé partisipa husi radio komunidade Laklubar Lian Idate nain haat, Radio Komunidade Balibo 5, nain ha’at, no Media Online Lian Orluli nain ha’at.
Jornalista : Odelia/Lucia
Editor : Clementina Fatima
