Lian Orluli, Maubisse — Administradór Postu Maubisse hato’o apresiasaun kle’an ba Parseria Raibia, JICA Maharo, no Governu ba kolaborasaun hahú atividade Tara Bando iha Suku Horai-Kiik Postu Administrativu Maubisse.Tarabandu ne’e kona-ba limitasaun kultura koidadu Ambiental sira
Iha Entervista Administradór Postu Maubisse,Joaquim Salsinha Soares, hato’o agradesimentu ba parte hotu-hotu ne’ebé kontribui ba preparasaun no implementasaun programa ne’e.
“Ami agradese tebes ba Parseria Raibia, JICA Maharo, no Governu ba sira nia kolaborasaun hodi inisia atividade Tara Bando. Inisiativa ida ne’e hanesan pasu importante ida hodi apoia dezenvolvimentu no empoderamentu komunitáriu iha nível aldeia,” nia dehan.
Administradór Postu mós rekomenda katak programa Tara Bando kontinua no habelar ba suku balun ne’ebé seidauk implementa.
Nia subliña importánsia sustentabilidade programa atu nune’e ninia benefísiu bele sente hanesan, husi komunidade hotu iha Postu Maubisse.
Programa Tara Bando ne’e rasik nu’udar esforsu kolaborativu ne’ebé ho objetivu atu hasa’e komunidade aldeia sira-nia kapasidade liu hosi abordajen partisipativu no sustentável, ne’ebé envolve parte interesada lokál oioin.
Ho sinerjia entre governu, instituisaun parseiru sira, no komunidade, hein katak atividade ida ne’e bele sai hanesan ezemplu konkretu kona-ba oinsá kolaborasaun entre setór sira bele iha impaktu pozitivu ba dezenvolvimentu suku iha postu Maubisse.
Entertantu iha atividade Tara bandu ne’e, Marka prezensa husi PAM Ainaro, Amo Paroqu Maubisse, Komandante Eskuadra Postu Maubisse, lideransa komunitariu Suku Horai-Kiik, inklui Lia nain no komunidade
Jornalista: Ekipa Redasaun
